Thursday, 24 May 2007

Rowers brand hoeweman se hande met strykyster

May 23 2007 09:07:45:227PM - (SA)

Linda de Beer

Rustenburg. – ’n Hoewebewoner van die Kroondal-omgewing se hande is met ’n strykyster gebrand toe hy oorval is terwyl hy Maandagaand sy motor geparkeer het.

Mnr. Johan Willem Senekal (69) van die Dinie Es- tates-kleinhoewes is deur vier gewapende aanvallers by sy huis ingedwing. Sy hande is vasgebind voordat dit met die strykyster gebrand is, het kapt. Elsabé Augoustides, polisiewoordvoerder, gesê.

Die rowers het met elektroniese toebehore uit Senekal se huis gevlug. Twee is in sy Toyota Land Cruiser vort, terwyl die ander twee vermoedelik in ’n Nissan Sentra gevlug het, het Augoustides gesê. Senekal het daarin geslaag om hom los te woel en hulp te ontbied.

Die Toyota is in die Kommandonek-omgewing opgespoor en lede van die Hartbeespoortdam-polisie se uniformtak het dit gevolg. Daar is op die polisie geskiet en hulle het teruggeskiet. Die bestuurder is in die linkerskouer gewond, terwyl die tweede verdagte weggehardloop het.

Die hoewe waar Senekal aangeval is, is glo skaars ’n kilometer van waar mnr. Hugo Wenhold (55) op 11 Mei geskiet is toe sewe gewapende mans hom en sy gesin aangeval het.

Dr. Paul Swart, DA-raadslid en inwoner van Kroondal, het aan Alta Snyman gesê die inwoners van dié omgewing is radeloos oor die toename in misdaad.

“My werkers het selfone vir hul veiligheid. Ek betaal een werker elke Sondag R50 om in my huis te sit terwyl ons in die kerk is, sodat daar iemand is wat ’n noodknoppie kan druk as daar moeilikheid is.”

Mnr. Herman Bals, lid van Rustenburg se gemeenskapspolisiëringsforum en oudkommandolid, het gesê misdaad het toegeneem sedert die kommando ontbind is. Min oudlede het nog as polisiereserviste aangesluit.

Enigiemand met inligting oor die aanval kan insp. Gys Coetzee van die Hartbeespoortdam-speurtak by 073 181 5907 bel.

Bron:News24/Beeld
http://www.news24.com/Beeld/Suid-Afrika/0,,3-975_2118185,00.html

Vir meer artikels, raadpleeg asseblief die argiewe en soekenjin in die sykolom.
For more articles, please use the archives section or search engine in the sidebar.