Monday, 18 February 2008

Musiekvideo verkla oor 'haatspraak teen wittes'

Feb 17 2008 08:45:58:343PM - (SA)

Sanri van Wyk

Die VF+ sal nie toelaat dat haatspraak en materiaal wat geweld teen minderheidsgroepe aanwakker, uitgesaai word nie.

Daarom, sê mnr. Wille Spies, VF+-LP, het hy namens die party ’n haatspraak-klag teen die musiekvideo Get out van die hiphop-kunstenaar Zubz (Ndabaningi Mabuye) by die Uitsaaiklagtekommissie (UKKSA) ingedien.

Die lirieke beeld wit mense uit as die onderdrukker en moedig geweld teen die groep aan, hoewel aan die einde van die liedjie genoem word dat nie alle wittes rassiste is nie en dus nie gewelddadig teen alle wittes opgetree moet word nie.

Enkele lirieke – vrylik vertaal – lui: “Verstaan dat ek hierdie panga teen jou nek gaan druk. Vat vandag wat myne is en ek sal jou môre beroof. Dis terugbetaaltyd.

“Sê vir my mense hulle moet baklei. En sê vir die onderdrukker om weg te gaan.”

Die hip-hop-kunstenaar Zubz is in Zambië gebore, het in Zimbabwe grootgeword en hom later in Johannesburg gevestig.

Die musiekvideo van die liedjie, sê Spies, is Saterdag 12 Januarie net ná middernag op SABC 1 uitgesaai.

Mulder sê hy het die klag verlede Maandag by die UKKSA ingedien.

“Die rede hoekom ons ’n bietjie lank gewag het om die klag in te dien, was dat dit lank gevat het om die lirieke te transkribeer en die klag gereed te kry,” het Spies gesê.

Oor die rede waarom hy die klag ingedien het, sê Mulder: “Ons wil verhoed dat dié tipe uitlatings uitgesaai word.

“Ons kan dit nie bekostig in Suid-Afrika nie.

“Vryheid van spraak is belangrik, maar as dit geweld teen minderhede aanpor, gaan dit te ver,” het Mulder gesê.

Mulder sê die UKKSA het reeds ontvangs van die klagte erken en wag nou op die SAUK se reaksie.

Mnr. Kaizer Kganyago, SAUK-woordvoerder, sê daar is nie veel wat hy kan sê voordat die UKKSA-paneel die klagte aangehoor het nie.

“Dit is ’n saak vir die vervaardigers van die musiek,” het hy gesê.

Rapport het gister berig mnr. Collin Mokgaotsi, woordvoerder van Outrageous Records, het gesê Zubz wil nie kommentaar lewer voordat die UKKSA ’n uitspraak oor die klag gelewer het nie.

Oorsprong:Beeld
http://www.news24.com/Beeld/Suid-Afrika/0,,3-975_2272403,00.html

Vir meer artikels, raadpleeg asseblief die argiewe en soekenjin in die sykolom.
For more articles, please use the archives section or search engine in the sidebar.