Saturday, 28 June 2008

Lewenslank ná hulle boer, vrou vermoor

Jun 27 2008 08:31:58:690PM - (SA)

Hilda Fourie

Drie mans wat ’n boer van Roedtan, Limpopo, geskiet en sy vrou koelbloedig vermoor het, is gister gevonnis tot lewenslange tronkstraf.

Herbert Ramushu (25), Zethonia Mamphulu (26) en Ben Mokobe (32) is in die hooggeregshof in Modimolle (Nylstroom) gevonnis, berig Sapa.

Hulle is vroeër skuldig bevind aan die moord van mnr. Hennie Janse van Vuuren (53) en sy vrou, Celia (53).

Dié egpaar is in Desember 2005 op hul plaas Doringfontein, buite Roedtan, vermoor. Beeld het vroeër berig dat Van Vuuren op sy knieë by sy plaashek langs sy bakkie gedwing is voordat hy in die voorkop geskiet is. Dit was kort nadat sy vrou koelbloedig in die tuin voor hul huis doodgeskiet is.

Ramushu is die dag na die voorval vasgetrek terwyl Mamphulu en Mokobe twee weke later gearresteer is.

Buiten die twee aanklagte van moord, is die beskuldiges ook skuldig bevind aan aanklagte van die onwettige besit van ’n vuurwapen en ammunisie en roof met verswarende omstandighede.

Supt. Ronel Otto, polisiewoordvoerder, het gesê al drie beskuldigdes is lewenslange vonnisse opgelê vir die moordaanklagte.

Hulle is ’n bykomende 15 jaar gevangenisstraf opgelê vir roof met verswarende omstandighede, vyf jaar vir die onwettige besit van ’n vuurwapen en drie jaar vir die onwettige besit van ammunisie.

Oorsprong:Beeld
http://www.news24.com/Beeld/Suid-Afrika/0,,3-975_2348402,00.html

Vir meer artikels, raadpleeg asseblief die argiewe en soekenjin in die sykolom.
For more articles, please use the archives section or search engine in the sidebar.