Tuesday, 29 July 2008

Man sterf ná rooftog op plaas by Nelspruit

Jul 28 2008 10:56:47:737PM - (SA)

Buks Viljoen

Mnr. Charles du Plessis (62), wat voorverlede Vrydag tydens ’n aanval op sy plaas buite Nelspruit in die maag gewond is, is dood.

Du Plessis, van Sterkspruit, is gewond pas nadat hy en sy vrou, Marietjie, die aand van hul huweliksherdenkingsete in Nelspruit by die huis aangekom het.

Sedert die aanval is Du Plessis, wat jare lank voorsitter van die plaaslike tak van AgriSA in die Laeveld was, in die waaksaal van Nelspruit Medi-Clinic behandel. Hy het nooit sy bewussyn herwin nie.

Sy toestand het die afgelope paar dae dramaties versleg en hy moes later aan lewensondersteunende toestelle gekoppel word.

Volgens ’n vriend van die gesin, mnr. Gerhard de Bruin, is die masjiene Sondagmiddag afgeskakel waarna hy dood is.

Die Du Plessis’s se twee Mitsubishi-voertuie, ’n Pajero en ’n Colt-bakkie, is in die rooftog gebuit.

Die voertuie is die volgende dag naby Malelane in die Onderberg ontdek waar dit in bosse langs die N4 versteek was.

Supt. Gerrie Agenbag, bevelvoerder van die speurtak op Nelspruit, het gesê hulle volg steeds verskeie leidrade op, maar dat nog geen verdagtes aangekeer is nie. Begrafnisreëlings was gister nog nie gefinaliseer nie.

Oorsprong:Beeld
http://www.news24.com/Beeld/Suid-Afrika/0,,3-975_2365760,00.html

Vir meer artikels, raadpleeg asseblief die argiewe en soekenjin in die sykolom.
For more articles, please use the archives section or search engine in the sidebar.