Sunday, 17 August 2008

Amanzimtoti kry dalk terroris se naam

16/08/2008 21:05 - (SA)

Gerhard de Bruin

Durban

Die vakansiedorp Amanzimtoti kan dalk na ’n bomplanter van die 1980’s vernoem word – dis as die ANC se jeugliga sy sin kry.

Mnr. Mxolise Kaunda, provinsiale voorsitter van die jeugliga in KwaZulu-Natal, het verlede week gesê die liga sal binnekort aan die Durbanse Ethekweni-munisipaliteit voorstel dat Amanzimtoti na Andrew Zondo hernoem word.

Zondo het in 1985 ’n kleefmyn in ’n besige winkelsentrum in Amanzimtoti laat ontplof wat die lewens van vyf mense geëis het.

Hy is later deur regter Raymond Leon (pa van die oud- DA-leier Tony Leon) die doodstraf opgelê en gehang.

’n Hoofstraat – wat eens Kingsway geheet het – is na Zondo vernoem, maar pogings om ’n skool in die gebied na hom te vernoem was tot dusver onsuksesvol.

Verskeie politieke opposisiepatye, inwoners van alle rasse in die dorp en selfs die Zoeloe- koninklike huis het hul afkeer van die voorgestelde naamsverandering laat blyk.

Oorsprong:Rapport
http://www.news24.com/Rapport/Nuus/0,,752-795_2377297,00.html

Vir meer artikels, raadpleeg asseblief die argiewe en soekenjin in die sykolom.
For more articles, please use the archives section or search engine in the sidebar.