Thursday, 28 August 2008

Dooie (12) had glo deel aan moord

Aug 27 2008 10:56:57:547PM - (SA)

Buks Viljoen

Die 12-jarige seun wat ’n maand gelede in Marlothpark deur die polisie doodgeskiet is, was waarskynlik by die moord van mnr. Fanie Keyser (47) van Pretoria betrokke.

Dié seun en sy 14-jarige makker (wat tydens die skietery in hegtenis geneem is) was met ’n AK47-aanvalsgeweer gewapen toe hulle deur die polisie in ’n kampong by Marlothpark vasgekeer is.

Die twee word ook met minstens vier ander rooftogte in dié natuurpark verbind waarin ’n AK47 as roofwapen gebruik is, sê kapt. Manie van Zyl van die polisie se eenheid vir georganiseerde misdaad in Mpumalanga.

Keyser is op 29 Desember 2007 koelbloedig by sy vakansiehuis in Marlothpark doodgeskiet, ’n dag voordat hy saam met sy vrou, Annelize (42), en seun, JC (13), na hul huis in Elarduspark, Pretoria, sou terugkeer.

’n Spesiale taakspan, onder leiding van Van Zyl, is in Februarie aangestel om die vlaag van rooftogte en moorde in Marlothpark te ondersoek.

Sedertdien is minstens 19 verdagtes in hegtenis geneem. Daar word nog na ses van die bendelede gesoek.

Volgens Van Zyl skuil die verdagtes iewers in Mosambiek.

) ’n Maand voor die Keyser-moord is mnr. Rudolph (Rudi) Harris (50) van Robertson in die Noord-Kaap ten aanskoue van sy vrou, Susan, en vriende doodgeskiet.

Van Zyl sê die twee seuns word egter nie met dié moord verbind nie.

Oorsprong:Beeld
http://www.news24.com/Beeld/Suid-Afrika/0,,3-975_2383720,00.html

Vir meer artikels, raadpleeg asseblief die argiewe en soekenjin in die sykolom.
For more articles, please use the archives section or search engine in the sidebar.