Wednesday, 20 August 2008

Rowers se koeëls eis man in sy slaapkamer

Aug 19 2008 09:26:16:547PM - (SA)

Virginia Keppler

Gewapende rowers het ’n mynkontrakteur gisteroggend omstreeks 01:30 in sy slaapkamer op ’n kleinhoewe in Hartbeeshoek, noord van Pretoria, doodgeskiet en sy vriendin aangerand.

Mnr. Martin Wilken (44) is twee keer in die bolyf geskiet. Een koeël het sy hart deurboor. Hy is op die toneel dood.

Mnr. Scott van Heerden (71), Wilken se gewese skoonpa, het gesê die rowers het ’n badkamervenster op die eerste verdieping gebreek.

“Een rower het deur die venster geklim en die voordeur vir die ander oopgesluit. Hulle (die rowers) is toe by die trappe na die boonste verdieping.

“Martin het hulle gehoor en opgestaan. Toe hy die slaapkamerdeur oopmaak, het hulle hom in die hart geskiet,” het Van Heerden gesê.

Hy het gesê die rowers het Wilken se vriendin, wat nie genoem wil word nie, na die onderste verdieping geneem.

“Hulle het haar vasgebind en toe met die pistool oor die kop geslaan. Sy het gesê sy het hulle aanhoudend gesmeek om haar nie te verkrag nie.”

Volgens van Heerden het die vriendin die motor se sleutel vir die rowers gegee toe hulle dit vra.

“Hulle het toe die videospeler, ’n skootrekenaar, nog ’n rekenaar en twee selfone gesteel en is in Martin se BMW weg.”

Insp. Dikatso Thebe, polisiewoordvoerder, het gesê die voertuig is gisteroggend in Soshanguve, noord van Pretoria, gekry.

Oorsprong:Beeld
http://www.news24.com/Beeld/Suid-Afrika/0,,3-975_2378999,00.html

Vir meer artikels, raadpleeg asseblief die argiewe en soekenjin in die sykolom.
For more articles, please use the archives section or search engine in the sidebar.