Tuesday, 25 November 2008

Polisie arresteer 2, skiet 1 oor moord

Nov 24 2008 07:18:48:533PM - (SA)

Linda de Beer

Die polisie in Noordwes het een verdagte dood geskiet en twee gearresteer weens die moord op 3 November op mnr. Brink Botha (53) van Mamogaleskraal in die Brits-omgewing.

Mnre. Given Zondi Nkuna en Thomas Chauke, ’n Zimbabwiese burger, is Donderdag in die vroeë oggendure in hegtenis geneem nadat inligting van die gemeenskap die polisie na Soshanguve in Pretoria gelei het, het adj.komm. William Mpembe gesê.

’n Derde verdagte, mnr. Derick Mabasa, ook ’n Zimbabwiër, het hom teen arrestasie verset en is noodlottig gewond toe die polisie op hom geskiet het.

Botha is twee keer in die bors geskiet tydens ’n worsteling met drie gewapende rowers deur ’n gebreekte kamervenster. Hy wou keer dat hulle die huis binnekom. Sy vrou, Christelle (39), en dogter, Odelia (13), is deur die rowers aangehou. Die gesin se ses honde is vergiftig.

Mpembe het gesê die polisie soek nog na ’n voormalige werker van die Bothas, ook ’n verdagte in die saak. Die ander twee verdagtes het gister die eerste keer in die hof verskyn. Die verloop van die hofverskyning was teen druktyd nie bekend nie. – Linda de Beer

Oorsprong:Beeld
http://www.news24.com/Beeld/Suid-Afrika/0,,3-975_2431888,00.html

Vir meer artikels, raadpleeg asseblief die argiewe en soekenjin in die sykolom.
For more articles, please use the archives section or search engine in the sidebar.