Saturday, 14 February 2009

‘Ons wens jy bloei dood, f***** Boer!’

Feb 13 2009 08:46:22:813PM - (SA)

Daniel Maluleke

‘Ons wens jy kan doodbloei, jou f***en Boer.”

So het een van sewe aanvallers wat hulle as polisielede voorgedoen het, aan ’n Pretoria- se man gesê toe hulle hom tuis aangerand en beroof het.

Mnr. Conrad Coertze (64), ’n enkelloper van George Storrarrylaan in Groenkloof, is eergister net ná 07:00 deur dié groep mans in polisie-uniforms oorval.

Die sewe het hom uit ’n blombedding bespring toe hy sy erf se hek gaan oopsluit het sodat sy tuinwerker en huishulp later kon inkom.

Coertze, wat gedink het hulle ís polisiemanne, het aan die rowers gesê: “Ek het niks gedoen nie. Hoekom wil julle my vang?”

“Een van hulle het ’n wapen onder my ken gedruk, terwyl die ander een syne in my linkeroor gedruk het.”

Die aanvallers het gesê hulle sal sy lewe spaar as hy saamwerk. Hulle het hom die huis ingedwing en hom aangerand.

Hulle het sy hande met dasse en sy voete met draad vasgemaak, hom herhaaldelik geskop en met die vuiste bygedam.

Die boewe het hom aanhoudend gevra waar sy kluis is. Hy kon nie praat nie, omdat ’n lap in sy mond gedruk is.

“Een van hulle het my met ’n mes op my regterbeen gesny en my tussen die bene en op my linkerknie geskop. Toe sê hy: ‘Ons wens jy kan doodbloei, jou f***en Boer’.”

Toe Coertze se tuinwerker, mnr. Lukas Makola (44), vir werk opgedaag het, het van die booswigte hom ook aangerand.

Hy het ’n kopbesering opgedoen en lê nou in die Steve Biko-hospitaal in Pretoria.

Nadat die rowers in Coertze se Toyota Corolla gevlug het, kon hy homself ná ’n gesukkel loskry. Hy het die noodknoppie gedruk om die ADT-veiligheidsmaatskappy te ontbied.

Makola se ma, mev. Anna Matsimbi, het op die geplunderde huis en bebloede vloer afgekom het. Sy is Coetze se huiswerker.

Matsimbi het dadelik twee blokke ver gestap om hulp te vra. Die polisie is ontbied.

Volgens Coertze is hy R1,5 miljoen se goed, onder meer ’n groot TV, juweliersware, ’n rewolwer, sy ring en die motor, kwyt.

Oorsprong:Beeld
http://www.news24.com/Beeld/Suid-Afrika/0,,3-975_2469734,00.html

Vir meer artikels, raadpleeg asseblief die argiewe en soekenjin in die sykolom.
For more articles, please use the archives section or search engine in the sidebar.