Thursday, 12 March 2009

Boer vermoor in huis waar hy sedert geboorte woon

Mar 11 2009 08:29:50:427PM - (SA)

Linda de Beer

’n Boer van Delareyville in Noordwes is gisteroggend dood gevind met ’n enkele skietwond in die bors in die plaashuis waar hy sedert sy geboorte woon.

’n Buurman het kort ná 07:00 op mnr. Wessel Badenhorst (55) afgekom waar hy op die kombuisvloer gelê het.

Sy moordenaars het ’n deur oopgebreek om toegang tot die huis te verkry, het insp. Wilmarie van der Merwe, polisiewoordvoerder, gesê.

’n Patroondoppie van ’n 9 mm-pistool is op die toneel gevind.

Plaaswerkers het onraad vermoed toe Badenhorst nie by die melkstalle opgedaag het nie.

Hulle het die buurman se hulp ontbied toe hy ook nie op hul geroep by sy huis geantwoord het nie.

Net Badenhorst se Isuzu-bakkie word in dié stadium vermis.

Hy het alleen op die plaas gewoon waar hy gebore is en grootgeword het, het mnr. Johnny van Biljon, ’n lewenslange vriend, gesê.

“Hy was sy hele lewe op die plaas. Sy pa en my pa was al maats.

“Hy was ’n eerlike, reguit ou. As jy nonsens gepraat het, was hy nie skaam om dit vir jou te sê nie,” het Van Biljon gesê.

Badenhorst was in die omgewing ook as Boetie bekend.

Hy word volgens Van Biljon deur ’n broer en ’n suster oorleef.

Die polisie weet nog nie hoeveel aanvallers daar was nie.

Niemand het glo iets op die plaas gesien of gehoor nie. Die presiese tyd van Badenhorst se dood moet ook nog bepaal word.

Oorsprong:Beeld
http://jv.news24.com/Beeld/Suid-Afrika/Home/0,,3-975_moreStories,00.html

Vir meer artikels, raadpleeg asseblief die argiewe en soekenjin in die sykolom.
For more articles, please use the archives section or search engine in the sidebar.