Sunday, 17 May 2009

‘Dit was nie roof, boer is gejag’

Mnr. Alan Rowe se familielede op die toneel van die moord - sy broerskinders, Graham en Laura Rowe, en hul tannie, me. Bev Rowe. Foto: Sandile Waka-Zamisa

Pietermaritzburg. – Die moord op ’n boer van die KwaZulu-Natalse Middellande wat “gejag” en doodgeskiet is, hou moontlik verband met grondeise.

Mnr. Gavin Hill, ’n buurman, meen egter ’n huurmoord het mnr. Alan Rowe (58) se lewe eergisteraand geëis.

“Hierdie was nie ’n kaping of rooftog wat skeefgeloop het nie. Hulle het hom ‘gejag’ met die doel om hom dood te maak.”

Rowe, eienaar van Bloemendal Estate by Rietvlei, het omstreeks 20:45 van Hill se huis teruggekom toe twee mans wat in sy motorhuis weggekruip het, op hom in sy Mazda Drifter-bakkie geskiet het.

Rowe het agteruit probeer wegry, maar die mans het aangehou skiet – een van sy linkerkant en die ander van agter ’n ander bakkie in die motorhuis.

Verskeie skote van ’n 9 mm-pistool en ’n .22-geweer het sy bakkie se voorruit getref.

Rowe het klaarblyklik uit die voertuig gespring en deur ’n heining geklim om na die pad se kant te loop. Sy selfoon is later naby dié heining gevind.

Die mans het hom egter ingehaal en twee keer in die bors geskiet. Een van dié koeëls is ook deur sy arm.

Sr.supt. Henry Budhram, polisiewoordvoerder, het gesê die moord kan met ’n twis oor grondeise verbind word, maar wou nie meer besonderhede gee nie.

Hill het gesê hy weet nie van enige probleme met grondeise op die plaas nie. Rowe se broer, Michael, het bevestig daar was nie grondeise nie, maar gesê daar was planne om die plaas aan ’n swart koper te verkoop.

Bloemendal Estate is ’n melk- en beesplaas, met sowat 375 melkkoeie en nog 50 beeste.

“My suster het nou uit Australië hier gekuier en ons het almal saam gekuier. En nou het dit in ’n tragedie geëindig,” het Michael gesê.

“Ons moes die nuus aan Alan se vrou, Jenny, oordra wat by hul huis in Howick was. Sy is in die hospitaal weens die trauma.”

Mnr. Bhekumuzi Magubane, voorman van Bloemendal, het gesê hy het nie Rowe se bakkie gehoor nie.

“Daar was net skote en ek het dadelik die ligte afgeskakel. Ek het deur die venster gekyk en die bakkie in trurat sien ry, en Rowe wat uitspring.

“Ek het dadelik die polisie gebel, maar daar was geen antwoord nie. Toe bel ek ’n polisieman wat ek ken en Hill se voorman.”

Hill en sy vriendin, me. Donna Lay, het hulle na die plaas gehaas, maar dit was te laat. Hulle het Rowe se liggaam gevind.

Die polisie is vol hoop dat die skuldiges vasgetrek sal word.

Budhram het enigiemand met inligting gevra om konst. Bonginkosi Dlamini by 033 417 0712 of 073 324 1974 te bel.

Oorsprong:Beeld
http://jv.news24.com/Beeld/Suid-Afrika/0,,3-975_2516796,00.html

Vir meer artikels, raadpleeg asseblief die argiewe en soekenjin in die sykolom.
For more articles, please use the archives section or search engine in the sidebar.