Sunday, 23 August 2009

'Meer boere op plase vermoor as in dié oorloë’

2009-08-20 11:48

Sarel van der Walt

Meer boere het die afgelope 16 jaar in plaasmoorde in Suid-Afrika gesterf as die algehele getal boere wat gedurende die destydse Mau-Mau-opstand in Kenia en die oorloë in Mosambiek, Rhodesië (Zimbabwe), Angola en Suidwes-Afrika (Namibië) dood is.

So het genl.maj. Chris van Zyl, ’n assistent-hoofbestuurder van die landbou-organisasie TLU SA, gister op ’n eiendomsregkonferensie van dié organisasie in Pretoria gesê.

Van Zyl het gesê volgens inligting tot hul beskikking het 1 127 mense sedert 1993 in altesame 1 864 “aangemelde plaasaanvalle” gesterf.

Hoewel daar die laaste tyd ’n afname in plaasaanvalle was, het die wreedheid daarvan toegeneem.

“Die brutaliteit wat met plaasaanvalle in Suid-Afrika gepaardgaan, is ongekend op ander plekke in die wêreld. Daarom is dit vir my onverklaarbaar dat daar nie in die buiteland baie oor die plaasmoorde in Suid-Afrika berig word nie,” het Van Zyl gesê.

“Vir elke plaasmoord wat plaasvind, is daar 12 of 13 plaasaanvalle.

“Bykans 78% van dié aanvalle word uitgevoer deur vreemdelinge. Die aanvallers is selde oudstryders, maar gewoonlik mense van tussen 22 en 28 jaar,” het Van Zyl gesê.

Daar is ook ’n verband tussen landelike misdaad en grond.

Navorsing het volgens hom bewys dit neem tot agt jaar om die plaas van ’n vermoorde produktiewe boer weer op dieselfde vlak te kry as voor die moord.

Oorsprong:Beeld
http://www.beeld.com/Content/Suid-Afrika/Nuus/1928/ac15fafbd4704f19b5c7db6be97c5712/20-08-2009%2011-08/Meer_boere_op_plase_vermoor_as_in_di%C3%A9_oorlo%C3%AB%E2%80%99

Vir meer artikels, raadpleeg asseblief die argiewe en soekenjin in die sykolom.
For more articles, please use the archives section or search engine in the sidebar.