Thursday, 6 August 2009

Stampvol kerk bring hulde aan geliefde terapeut

Aug 04 2009 09:19:20:190PM - (SA)

Amanda Roestoff

“Mamma is so jammer dat ek Woensdag nie daar was om jou te beskerm nie...”

So lui ’n brief van mev. Marietjie Pieterse, wat haar kleinseun, mnr. Jacques O’Dell, gister tydens sy ma, Marinda, se troosdiens in die NG kerk Paardekraal-Monument in Krugersdorp voorgelees het.

Die kerk was stampvol en stoele moes inderhaas vir rouklaers ingedra word om van dié arbeidsterapeut afskeid te neem.

Kindersketse van “ ’n geliefde en goeie vrou” en bosse kleurvolle blomme het bo-op en langs die houtkis gepryk.

By die aanvang van die diens het bosgeluide deur die kerkgebou weerklink.

Bostonele is ook as agtergrond op haar begrafnisbrief gebruik, “want dis waar Marinda tuisgevoel het”, het ds. Piet Stofberg gesê.

O’Dell is verlede Woensdag verskeie kere met ’n mes in haar huis in Noordheuwel gesteek voordat haar keel afgesny is.

Haar 17-jarige dogter, Alicia, het toe reeds bewusteloos gelê nadat die aanvallers haar met ’n breekyster geslaan en gewurg het.

O’Dell was verbonde aan die Lanternskool vir kinders met spesiale onderrigbehoeftes in Roodepoort.

In haar brief het Pieterse gesê: “Jou geboorte was die wonderlikste geskenk van God aan my. Jy was my hele lewe. Jou liefde vir kinders was orals bekend.

“Jy’t soveel kinders verniet behandel wat dit nie kon bekostig nie.

“Ek beloof om net die beste na jou gesin om te sien.”

Ná die diens het O’Dell se naaste familie en vriende die kis na die lykwa gedra, waar skoolkinders, onderwysers en vriende saamgedrom het.

Sy sal privaat veras word.

Oorsprong:Beeld
http://jv.news24.com/Beeld/Suid-Afrika/0,,3-975_2545117,00.html

Vir meer artikels, raadpleeg asseblief die argiewe en soekenjin in die sykolom.
For more articles, please use the archives section or search engine in the sidebar.