Sunday, 22 November 2009

Man op plaas naby Botrivier geskiet

2009-11-21 01:09

Malani Venter

Stellenbosch. – “Dit help nie ons hol weg nie. Dit is die tye waarin ons leef.”

Só het mnr. Kosie Kellerman van Botrivier gesê nadat sy seun, Bartholo­meus, Woensdagaand op die plaas Stelkloof naby Botrivier geskiet is.

Mnr. Bartholomeus Kellerman (29) het omstreeks 21:00 saam met sy vrou en kind van Grabouw by sy plaashuis aangekom toe hy onraad in die huis vermoed.

Volgens kapt. William Solomons, polisiewoordvoerder van die Caledon-polisie, het Kellerman gesien die huis se ligte brand en die gordyne is toegetrek.

“Hy het onraad vermoed omdat hy weet hulle het nie die ligte aan gelos of die gordyne toegetrek nie,” het Solomons gesê.

Kellerman het besluit om na sy pa se nabygeleë huis te ry. Twee skote is op die gesin geskiet toe hulle deur die plaasingang gery het, het Solomons bygevoeg.

Kellerman is in die linkersy gewond, maar het aanhou bestuur na sy pa se huis en die polisie onmiddellik laat ontbied. Hy is na die Vergelegen Medi-Clinic in Somerset-Wes gebring.

Volgens Solomons is dit nog onbekend hoeveel verdagtes betrokke was.

Enigiemand met inligting kan insp. J. Newman by 0 028 214 3916 bel.

Oorsprong:Die Burger
http://www.dieburger.com/Content/Suid-Afrika/Nuus/1708/0f740ce0a75c417597266d5072388afb/21-11-2009-01-09/Man_op_plaas_naby_Botrivier_geskiet

Vir meer artikels, raadpleeg asseblief die argiewe en soekenjin in die sykolom.
For more articles, please use the archives section or search engine in the sidebar.