Sunday, 15 November 2009

SA plaasaanvalle eis meer as dié oorlog

2009-11-12 02:12

Sarel van der Walt

Altesame 91 Britse soldate het vanjaar in die oorloggeteisterde Afganistan gesterf, terwyl minstens 111 mense in dieselfde tydperk in plaasmoorde in Suid-Afrika dood is.

Dit blyk uit statistieke van die landbou-organisasie TLU SA.

“Omdat die polisie nie amptelike statistieke bekend wil maak nie, is ons afhanklik van mediaberigte om ons syfers op datum te hou,” het mnr. Chris van Zyl, assistent-hoofbestuurder van TLU SA, gister by navraag gesê.

Die afgelope agt jaar het 232 Britse soldate in Afganistan gesneuwel, terwyl 292 mense in net vier jaar in plaasaanvalle in Suid-Afrika dood is.

Die polisie het Agri SA se na- sionale veiligheidskomitee vandeesweek op ’n vergadering in Centurion gevra om nie die statistieke bekend te maak wat die polisie aan hulle gegee het nie.

Op dié vergadering het mnr. André Botha, voorsitter van dié veiligheidskomitee, onverantwoordelike uitsprake deur politici en senior staatsamptenare die skuld vir plaasaanvalle gegee.

Hy het gistermiddag gesê hy glo TLU SA se syfers is “konserwatief”. Botha sê huisrooftogte, kapings, verkragtings en veral veediefstal het kwaai toegeneem in landelike gebiede. Swart én wit loop deur.

Ná die moord op dr. Warwick Dorning, bekende KwaZulu-Natalse boer, vroeër vandeesweek het die ANC in dié provinsie luidens berigte gesê hy neem kennis van bekommernisse van landbougroepe oor die veiligheid van boere en ander plaasbewoners.

- Beeld

Oorsprong:Beeld
http://www.beeld.com/Content/Suid-Afrika/Nuus/1928/f037291e55ec4ae7acf1c3f8d079542c/12-11-2009-02-12/SA_plaasaanvalle_eis_meer_as_di%C3%A9_oorlog

Vir meer artikels, raadpleeg asseblief die argiewe en soekenjin in die sykolom.
For more articles, please use the archives section or search engine in the sidebar.