Sunday, 27 December 2009

‘Skrikwekkende messe’ in aanval op egpaar gebruik

2009-12-24 04:59

Pia Nänny

Hermanus. – “My ergste vrees was dat hulle my keel gaan afsny of my vrou gaan verkrag.”

Só het die gewese Suid-Afrikaner mnr. Martin Stern (59) gister uit sy hospitaalbed in die Hermanus ­Medi-Clinic gesê.

Hy en sy vrou, Janet (57), is Dinsdag deur twee mans in die Fernkloof-natuurreservaat in Her­manus wreed aangeval en beroof.

Besoekers aan dié reservaat is gewaarsku om uiters versigtig te wees omdat dit moeilik is om dié “reusagtig groot” reservaat te ­patrolleer.

Stern, wat deesdae in Kanada woon, het gesê hulle het al voor 07:00 gaan stap en geen onraad vermoed toe hulle verby die twee mans gestap het nie. Die mans het egter omgedraai en hulle van agter aangeval.

“Hulle het skrikwekkende messe, amper soos jagmesse, gehad,” het Stern gesê.

Hy is in die gewrig en rug gesteek. Sy vrou is twee keer gesteek. Hulle is ook op die grond neergegooi en met klippe bestook.

Die aanvallers het hul hande en voete met hul eie skoenveters vasgebind en hulle van onder meer ’n kamera en troupand beroof.

“My vrou het heeltyd gevra: ‘Sou jy jou ma so behandel?’ Ons is Jode en sy het vir my in Hebreeus gesê: ‘Ons moet bid dat God ons sal help.’ Hulle het toe weggegaan.”

Die Sterns, wat albei teen daardie tyd al baie bloed verloor het, het besef hulle moet hulp kry. Hulle het daarin geslaag om hulself los te wikkel en het mekaar aangemoedig om deur te druk.

Sowat twee uur ná die aanval het hulle die Joubert-gesin van Bloemfontein raakgeloop.

“Hulle was fantasties. Hulle het ons gesigte afgevee, vir ons water gegee en probeer om die bloeding te stop.” Pieter Joubert het ook die nooddienste gekontak.”

Stern was ook vol lof vir die reddingsdienste en paramedici.

“My bloeddruk was baie laag toe die paramedikus my ondersoek. As ek aan myself oorgelaat was, het ek dit nie gemaak nie,” het Stern gesê.

Die Sterns, wat in Kaapstad gewoon en in 1986 na Kanada geëmigreer het, het gesê hul dogters, wat oorsee woon, was baie ontsteld toe hulle van die aanval hoor.

“Vir baie oorsese toeriste is misdaad een van die groot bekommernisse wanneer hulle na Suid-Afrika reis.

“Ons is baie lief vir Hermanus en sal graag weer wil kom, maar indien jy nie ’n goeie rede het om Suid-Afrika as jou vakansiebestemming te kies nie, is daar baie ander nader plekke waarheen jy kan gaan.”

Stern het gesê besoekers behoort duidelik gewaarsku te word wanneer hulle in Fernkloof wil gaan stap.

- Die Burger

Oorsprong:Die Burger
http://www.dieburger.com/Content/Suid-Afrika/Nuus/1708/d80cbdf57b5f47b6840521ac65c0013a/24-12-2009-04-59/%E2%80%98Skrikwekkende_messe%E2%80%99_in_aanval_op_egpaar_gebruik

Vir meer artikels, raadpleeg asseblief die argiewe en soekenjin in die sykolom.
For more articles, please use the archives section or search engine in the sidebar.