Sunday, 20 December 2009

Terreur tóé, maar bomplanters is nóú helde

deur E. de Clerk
2009-12-17 22:32

Hoe kan daar ooit versoening in ons land plaasvind wanneer mense wat terreurdade gepleeg het, vereer word?

Beeld berig oor ’n landsvlag en ’n sertifikaat wat deur pres. Jacob Zuma oorhandig is aan die vrou van ’n man wat as “vryheidsvegter” in die Kerkstraat-bomontploffing in 1983 dood is.

Dié lafhartige daad word nou voorgehou as die dapper optrede van mense wat vir hul vryheid gesterf het.

Die “vegters” se name gaan op die Muur van Name by Vryheidspark in Pretoria gegraveer word.

Hoe moet die onskuldige mense voel wat familie en vriende in hierdie laakbare ANC-terreuraanval verloor het?

Die ANC gebruik nog steeds die apartheidmonster om sy menseregtevergrype van die 1980’s te probeer regverdig.

Hy verswyg egter dat die metodes wat hy gebruik het – soos aanvalle op burgerlikes en die gebruik van bomme en landmyne – uitdruklik deur die Geneefse Konvensie verbied word.

Dus terreuraanvalle, maar nou word die bomplanters as helde vereer.

Die waarheid word verdraai en die geskiedenis word deur die ANC herskryf asof hulle nooit hierdie grusame dade gepleeg het nie. En almal moet hulle daarmee versoen.

Oorsprong:Beeld
http://www.beeld.com/Content/MyBeeld/Briewe/1976/59824bebb6814c5f8dd79be81cb41850/17-12-2009-10-32/Terreur_t%C3%B3%C3%A9,_maar_bomplanters_is_n%C3%B3%C3%BA_helde

Vir meer artikels, raadpleeg asseblief die argiewe en soekenjin in die sykolom.
For more articles, please use the archives section or search engine in the sidebar.