Sunday, 20 December 2009

Waarom word Madiba verheerlik?

deur JP du Plessis
2009-12-18 04:26

A.B. Reuvers besing nou skielik oudpres. Nelson Mandela se lof nadat hy Invictus gesien het, en sê hy het nooit besef wat Mandela vir ons gedoen het nie.

Hy moet sy oë oopmaak en hom nie deur ’n fliek laat mislei nie. Die waarheid is dat Mandela in die tronk was omdat hy die leier van ’n gewelddadige terreurorganisasie was. Die ANC was verantwoordelik vir die dood van tienduisende onskuldige mense, waarvan 92% swart was. Mandela het erken dat hy toestemming vir die 1983-Kerkstraatbomaanval gegee het, waarin 19 onskuldige mense dood en 200 beseer is. Ná die verkiesing in 1994 raak Mandela die president en wat gebeur? Almal is gaande oor die nuwe reën­boognasie, maar die eerste ding wat Mandela doen, is om die almagtige God uit die parlement te haal. Daarvandaan was dit net afgrond toe.

Vandag is Suid-Afrika een van die gevaarlikste en mees misdaadgeteisterde lande wat nie by ’n oorlog betrokke is nie. Moordsyfers is sewe keer hoër as Amerika s’n en verkragtingsyfers tien keer hoër. Dan praat ek nie eens van kinderverkragting waarin ons die wêreldleier is nie. Alle vorme van gewapende geweld is buite beheer.

Ek verstaan nie waaroor Reuvers gaande is nie. Die toestand van ons hospitale, skole, weermag en polisie, tesame met die korrupsie en selfverryking in die regering, is ’n duidelike bewys dat die Mandela-era ’n mislukking was.

Toestande in ons land het sedert 1994 ernstig verswak. Onthou niemand meer ons eens trotse weermag en polisiemag of die uitnemende diens wat enigeen in die Tygerberg- en Baragwanath-hospitale ontvang het nie? Die standaard was so hoog dat ander Afrika-leiers hierheen gevlieg het vir behandeling. Hoe lyk dit vandag?

Is daar werklik rede om Mandela te verheerlik? Verheerlik eerder die Here God en kyk dan hoe dinge verander.

Oorsprong:Die Burger
http://www.dieburger.com/Content/MyDieBurger/Briewe/1645/b5df7d03cef644ec9a7f19614a4fcc38/18-12-2009-04-26/Waarom_word___Madiba_verheerlik

Vir meer artikels, raadpleeg asseblief die argiewe en soekenjin in die sykolom.
For more articles, please use the archives section or search engine in the sidebar.