Sunday, 24 January 2010

Vrou in roof by woonstel op hoewe in heup geskiet

2010-01-07 00:32

Linda de Beer

’n Vrou wat onlangs in ’n huurwoonstel op ’n kleinhoewe buite Hartbeespoort ingetrek het, is gister in die vroeë oggendure deur inbrekers in die heup geskiet.

Twee skote is op me. Christa Denicker (53) geskiet toe sy die inbrekers in die sitkamer verras het. Sy het opgestaan om ondersoek in te stel nadat ’n geraas in die kombuis haar wakker gemaak het, het supt. Lesego Me- tsi, polisiewoordvoerder in Noordwes, gesê.

Denicker en haar man, Adriaan, het onlangs in dié woonstel op ’n kleinhoewe in Melodie ingetrek, het mnr. Romano van der Spuy, voorsitter van die plaaslike gemeenskapspolisiëringsforum (GPF), gesê. Die eienaar van die huis wat aan die woonstel grens, het die plotwag ontbied toe sy die skote hoor.

Volgens Van der Spuy het die twee verdagtes ’n skuifdeur uit sy raam gelig om toegang tot die huis te verkry. Hulle het daarna die veiligheidshek tussen die kombuis en die sitkamer oopgebreek. Dit is vermoedelik wat Denicker wakker gemaak het.

Metsi het gesê die koeël van die ander skoot wat op Denicker geskiet is, het ’n muur getref.

Sy is per ambulans na ’n plaaslike hospitaal geneem.

Haar toestand is volgens inligting wat die GPF ontvang het ernstig, maar bestendig.

Die polisie weet in dié stadium net van ’n DVD-speler en juweliersware wat gebuit is, het Metsi gesê. Die verdagtes het vermoedelik te voet gevlug. Volgens Van der Spuy is die omgewing baie bebos en ruig.

- Beeld

Oorsprong:Beeld
http://www.beeld.com/Content/Suid-Afrika/Nuus/1928/a6ff3ab6f6a9482d9a86beded1cb7a71/07-01-2010-12-32/Vrou_in_roof_by_woonstel_op_hoewe_in_heup_geskiet

Vir meer artikels, raadpleeg asseblief die argiewe en soekenjin in die sykolom.
For more articles, please use the archives section or search engine in the sidebar.