Sunday, 14 February 2010

'Pyn steel nie my geluk'

Louis en Hettie Brittz gister. Sy is Maandagnag verkrag, maar sê Jesus, haar “beste vriend”, het haar “nooit alleen gelaat nie”. Foto: Theana Calitz

2010-02-11 08:20

Neels Jackson

Die Here het haar gewaarsku dat sy verkrag gaan word. Hy het haar nie alleen gelos nie en sy voel haar siel en gees het ongeskonde daardeur gekom.

So het ’n ongelooflik sprankelende me. Hettie Brittz, vrou van die gospelsanger Louis Brittz, gister gesels oor haar verkragting Maandagnag.

Ondanks haar nagmerrie-ervaring toe gewapende rowers hulle in hul huis in ’n veiligheidsbuurt in Centurion oorval het, gaan dié moedige vrou eerskomende naweek die Midmar-myl swem.

Sy sê sy sien al ’n jaar lank daarna uit en sy gaan nie toelaat dat dié voorval haar lewensgeluk steel nie.

Haar man het nog gewerk toe die rowers Maandagnag by hul huis inbars. Hulle het hom na die slaapkamer gebring waar Hettie reeds in die bed was.

In die kamer het Louis “in die naam van Jesus” (en in Engels sodat die rowers kon verstaan) aan haar gesê dat die mans hul goed sal vat, maar hulle nie sou seermaak nie.

Hulle is gedwing om op die vloer te lê waar Louis aan Hettie gesê het as dit die einde is, sal hulle mekaar weer in die hemel sien.

Later het die rowers hom weggeneem. Een het by Hettie gebly waar sy met haar hande vasgebind half onder die bed
gelê het.

Sy sê terwyl sy so gelê het, het sy gehoor die Here sê aan haar: “Hettie, jy is my bruid.”

Sy het geantwoord: “Ja, Jesus, ek weet dit.”

Sy sê die Here het daarna aan haar gesê die man gaan haar verkrag, maar sal haar nie seermaak nie. Die verkragter was ook nie gewelddadig nie.

Die ondersoek wat sy ná die tyd in die hospitaal moes ondergaan, was vir haar erg. Sy moes ’n klomp medisyne drink wat haar baie naar gemaak het. Sy is ook nou op antiretrovirale behandeling om MIV-infeksie teen te werk.

Vir haar is dit egter “battle scars in ’n oorlog wat ons nie kan verloor nie”.

Ook Louis verstaan die gebeure as ’n aanslag in ’n geestelike oorlog (berig op bl. 4).

Die Here leef buite tyd en ruimte, sê Hettie. Wat nou met haar gebeur het, was relevant 2 000 jaar gelede toe Jesus ook vir die verkragter aan die kruis gesterf het.

Dit sal oor tien jaar relevant wees as hulle kan getuig oor alles wat hieruit voortgevloei het.

Sy sê nie daarmee dat die verkragting onbelangrik is nie. Dis ook nie vir die Here onbelangrik nie. Hy sê immers dat Hy mense se trane in ’n sak bymekaarmaak en dat gelowiges se bloed vir Hom kosbaar is.

Sy weet die Here staan nie gevoelloos nie. Hy het haar voorberei en sy beleef dat Hy haar siel en gees ongeskonde vashou, ondanks dit wat met haar liggaam gebeur het.

Sy weet mense sal sê sy leef in ontkenning. Sy is egter self ’n terapeut en weet wat trauma behels, sê sy.

Sy weet daar gaan tye kom dat sy kwaad raak, maar sy vermoed sy sal nie bitter word nie. Die Here sal haar daarteen beskerm. Bitterheid sal niks aan die verkragter doen nie, maar dit sal haar opvreet.

Vir die verkragter voel sy én Louis jammer. Hulle dink hy is pateties. Hy het waarskynlik nog nooit die liefde van ’n vrou ervaar nie.

Selgroep staan hulle by

“Ek weet nie hoe hanteer mense sulke goed sonder die liggaam van Christus (medegelowiges) nie.”

So het die gospelsanger Louis Brittz gister gesê van die steun wat hy en sy gesin van medegelowiges gekry het.

Lede van hul selgroep en ander Christene het vir hulle kos aangedra, aan elkeen ’n selfoon gegee en Hettie hospitaal toe gebring.

Hulle het Louis en Hettie twee nagte in ’n gastehuis laat oorbly en ander huisvesting aangebied as hulle nie weer na hul huis wou teruggaan nie.

Hulle het ook Louis se reisreëlings help verander. Hy sou eergister op ’n toer na Doebai, Australië en Nieu-Seeland vertrek.

Hul selgroep het soos ’n masjien gewerk om dinge vir hulle maklik te maak, sê Louis.

“Jy kan nie bekostig om nié in ’n selgroep te wees nie.”

Hy is ook vol lof vir die manier waarop Lyttelton se polisie die saak hanteer het.

Hulle het dit professioneel, met deernis en met vasberadenheid gedoen.

Oorsprong:Beeld
http://www.beeld.com/Content/Suid-Afrika/Nuus/1928/1dd6c60a76e14aa994b2125639fbbf9c/11-02-2010-08-20/Pyn_steel_nie_my_geluk

Vir meer artikels, raadpleeg asseblief die argiewe en soekenjin in die sykolom.
For more articles, please use the archives section or search engine in the sidebar.