Thursday, 15 April 2010

Oud-brandweerhoof op kleinhoewe vermoor

2010-04-14 11:12

Wolfram Zwecker

’n Oud-brandweerhoof van Nigel, mnr. Gert Pretorius (67), is gisteroggend voor ’n skuur op sy kleinhoewe by Holgatfontein doodgeskiet in die eerste plaasmoord in ’n lang tyd aan die Oos-Rand.

Die vermeende aanvaller, een van sy hoewewerkers, het daarna van sy eiendom uit sy kamer naby die agterdeur van Pretorius se hoewehuis gevat en met Pretorius se bakkie gevlug.

Volgens ao. Madelein von Wielligh, woordvoerder van die Nigel-polisie, het die aanvaller omstreeks 09:00 gisteroggend die kombuis binnegekom waar mev. Anet Pretorius, die slagoffer se vrou, besig was om die verdagte se weekoue baba se winde uit te vryf.

“Hy het haar met ’n vuurwapen gedreig en die sleutel vir die kluis geëis. Sy het dit nie by haar gehad nie en hy het haar aangerand en vasgebind,” het Von Wielligh gesê.

Die aanvaller het toe blykbaar met ’n hoekslyper die kluis oopgesny en ’n vuurwapen en juwele gevat.

Hy is daarna uit die huis uit, vermoedelik om Pretorius te gaan soek wat besig was om voer vir sy varke by die skuur af laai. Dit is nie bekend wat presies dáár gebeur het nie, maar mev. Pretorius, wat haar kon loswikkel en haar man gaan soek het, het hom by die skuur aangetref.

Hy is op ’n kort afstand regs bo in sy bors geskiet. Die polisie is omstreeks 11:00 van die aanval verwittig.

Pretorius was meer as 35 jaar aan die brandweer en nooddienste van Nigel verbonde. Hy het die laaste sowat 12 jaar op sy hoewe, 10 km buite Nigel, geboer.

Die verdagte is nog soek. Hy het met Pretorius se rooi Mazda Drifter-bakkie (registrasienommer FYS 379 GP) gevlug.

Die baba en sy ma het vermoedelik saam met die verdagte verdwyn.

Oorsprong:Beeld
http://www.beeld.com/Suid-Afrika/Nuus/Oudbrandweerhoof-op-kleinhoewe-vermoor-20100414

Vir meer artikels, raadpleeg asseblief die argiewe en soekenjin in die sykolom.
For more articles, please use the archives section or search engine in the sidebar.