Saturday, 10 April 2010

Sy vlag is gestryk


Ondersteuners van mnr. Eugène Terre’Blanche drom gistermiddag om sy kis saam toe dit by die AP kerk in Ventersdorp ingedra word. Foto: Kim Ludbrook, EPA

2010-04-09 22:10

Marida Fitzpatrick

Ventersdorp. – Breëborsmans in kakieklere het openlik gehuil toe die AWB-vlag gister hier oor die kis van mnr. Eugène Terre’Blanche, vermoorde AWB-leier, getrek is.

Tientalle mense het van oor die land heen op die dorp toegesak vir Terre’Blanche se begrafnis en die kerk van hoek tot kant volgepak.

Begrafnisgangers het opgestaan en “Die Stem” gesing toe die kis met ’n wit kruis en ’n ruiker blomme die kerk ingestoot is en langs ’n foto van Terre’Blanche en sy perd Atilla voor in die kerk staangemaak is.

“Lanklaas is ’n volk so geskud,” het ds. Ferdie Devenier, wat die diens gelei het, gesê.

Aan mev. Martie Terre’Blanche en hul dogter, Bea, het Devenier gesê: “Ons harte is saam met u stukkend. Groot getalle mense slaan vandag hul arms om julle.”

Toe het hy gebid: “Ons weet die slegte handlangers van Satan het dit gedoen, maar U het dit toegelaat.” Dis alles deel van “die raadsplan van God”, het Devenier verduidelik.

Oor Terre’Blanche se omstredenheid het hy gesê: “Oom Eugène was geen engel nie, maar God red nie engele nie.”

Mense het dwarsdeur die diens trane afgevee.

As die Afrikanervolk weer die land wil regeer, moet hulle die afgode los, het Devenier gepreek. “Los die Lotto-kaartjie, die drankgod, die wellus en die sportgod.”

Met subtiele verwysing na die wraakplanne waaroor berig is, het hy gemaan: “Ek weet baie mense wil baie dinge doen. Los daardie dinge. Begin by die Here.”

In ’n huldeblyk aan Terre’Blanche het mnr. Andries Breytenbach, voorsitter van die Afrikanerfront, gesê meer as 3 300 boere is sedert 1994 vermoor.

Die sanger Steve Hofmeyr, wat van kop tot toon in swart geklee was, het Terre’Blanche in ’n vurige toespraak as “die laaste Boer, trotse kultuur-ikoon en vir baie ’n politieke leier” beskryf (lees berig op bl.?5).

Op die maat van die lied “Genade onbeskryflik groot” is die kis uit die kerk gedra. ’n Huilende mev. Terre’Blanche, in ’n swart strepiesbroekpak, is deur familielede ondersteun.

Op pad na Terre’Blanche se plaas, Witrandjiesfontein, waar hy in die familiekerkhof begrawe is, het die liedjie “De la Rey” uit talle van die bakkies opgeklink.

Een man het langs die pad stilgehou en ’n piksteel en ’n panga op die enjinkap van sy bakkie neergesit.

Vierkleure en ander ou vlae het oral gewapper en ’n yslike Vierkleur is oor ’n stuk grond minstens so groot soos ’n rugbyveld uitgegooi.

Omring deur ’n menigte joernaliste en ander mense het die familie deur ’n erewag van ses swart perde en ruiters na die grafkelder gestap.

Toe die kis laat sak is, het mev. Terre’Blanche snikkend gehuil terwyl ’n man die “Onse Vader” gesing het.

Daarna het mense enkele rooi en geel rose op die kis gegooi voordat die grafkelder met ’n staalplaat bedek is. Talle mans in kamoefleerdrag of AWB-uniforms het die kis gesalueer.

So baie mense het die begrafnis bygewoon dat mense nog in die stoet op pad na die plaas was toe die teraardebestelling al verby was en mense na die dorp begin terugkeer het.

Sommige het die aantal begrafnisgangers op meer as 10 000 geraam.

Onder hulle was hoëlui soos me. Tina Joemat-Pettersson, minister van landbou, bosbou en visserye, dr. Pieter Mulder, haar adjunk en leier van die VF+, en me. Maureen Modiselle, premier van Noordwes.

Verkeerschaos het die hele dag op die dorp geheers, met toue en toue motors wat eers by die kerk en toe by die kerkhof probeer uitkom het.

Oorsprong:Beeld
http://www.beeld.com/Suid-Afrika/Nuus/Sy-vlag-is-gestryk-20100409

Vir meer artikels, raadpleeg asseblief die argiewe en soekenjin in die sykolom.
For more articles, please use the archives section or search engine in the sidebar.