Friday, 14 May 2010

ANCYL gaan militêre opleiding ontvang

2010-05-13 20:00

Johannesburg – Die ANCYL se nasionale uitvoerende komitee, gelei deur hul leier Julius Malema, sal in September militêre opleiding ontvang, is Donderdag aangekondig.

Lindiwe Sisulu, die minister van verdediging, het ooreengekom om die nodige reëlings te tref, het die ANCYL en die departement in ‘n gesamentlike verklaring gesê.

Hierdie ooreenkoms is gemaak terwyl Sisulu die ANCYL se nasionale uitvoerende komitee toegespreek het en diensplig voorgestel het vir die werklose jeug, het hulle gesê.

Sisulu het die voordele van die program uitgelig en het insette van die ANCYL ontvang oor hoe diensplig geïmplementeer moet word.

“Die diensplig sal werklose jongmense basiese militêre opleiding en belangrike vaardighede leer om hulle toe te rus vir hul toekoms,” het sy gesê.

“Terwyl hulle twee jaar se basiese militêre opleiding in een van die Suid-Afrikaanse verdedigingsmag se dienste – SA weermag, SA lugmag, SA vloot of SA mediese dienste – ondergaan, sal hulle ook verskeie vaardighede leer en praktiese werkservaring opdoen wat hulle in die toekoms kan gebruik.

Sisulu het bygevoeg dat die program deur tersiêre instellings erken sal word.

- Sapa

Oorsprong:Nuus24
http://www.nuus24.com/Suid-Afrika/Nuus/ANCYL-gaan-milit%C3%AAre-opleiding-ontvang-20100513

Vir meer artikels, raadpleeg asseblief die argiewe en soekenjin in die sykolom.
For more articles, please use the archives section or search engine in the sidebar.