Wednesday, 26 May 2010

Boere ontsteld oor soldate se 'Uhuru'

2010-05-25 13:32
Charles Smith, Volksblad

Bloemfontein - Boere in die omgewing van De Brug buite Bloemfontein is ontsteld oor die woord “uhuru” wat deur soldate teen ’n koppie reg langs die N8-hoofpad met klippe uitgepak en wit geverf is.

Die gevoel is dat dit ’n politiek gelaaide woord is en veral ná die moord op Eugene Terre’Blanche, die AWB-leier, was dit ’n slegte tyd vir die weermag om dit toe te laat.

“Uhuru” beteken “vryheid” in Swahili, maar word in regse kringe verbind met die mite “die nag van die lang messe”, waar swartes glo ná die dood van oudpres. Nelson Mandela wittes sal aanval.

Die woord is Vrydag deur soldate van 14SA Infanteriebataljon van Umtata teen die koppie uitgepak nadat hulle met weermagvoertuie aangery is. Die eenheid word vandeesweek vir ’n vredesending na die Demokratiese Republiek van die Kongo (DRK) ontplooi. Hulle word van De Brug af uitgeplaas.

Hoewel in weermagkringe gesê word dit is die eenheid se tradisie om dié woord in ’n spanbousessie uit te pak, kan nie gesê word hoekom dit die woord “uhuru” moet wees nie.

Volksblad verneem kol. Khotso Mpiwa, die basis se bevelvoerder, het die naampakkery goedgekeur en self gesê dat die verf en kwaste aan die 14SAI-soldate gegee word. Hy het gisteraand gesê ’n amptelike verklaring sal spoedig hieroor uitgereik word.

Die woord is sowat twee jaar gelede ook teen ’n koppie wes van die basis uitgepak, maar dit was op private grond en is ná 14SAI se vertrek deur lede van die basis afgebreek omdat dit as haatspraak beskou kon word. Min mense kon dit toe sien.

Piet Ferreira, landbouleier verantwoordelik vir veiligheid in die gebied, het gesê in die lig van die SMS op Vryheidsdag, waarin gewaarsku is oor ’n aanval op wittes, is dié voorval kommerwekkend.

“Die SMS het geblyk ’n klomp nonsens te wees. Maar daarna en ook met die mite van die nag van die lang messe, word nou op ’n militêre terrein die woord ‘uhuru’ geskryf. In die lig van dié politiek sensitiewe goed, laat dit ons baie ongemaklik.”

Ferreira het gesê hy gaan die kwessie vir seker met die weermag opneem en vra dat die klipstapel verwyder word. Hy kon nie gister die bevelvoerder in die hande kry nie.

P.W. de Vos, ’n boer betrokke by die plaaswag, sê by De Brug is geen veiligheidsprobleme nie, maar die gemoedere word onnodig met die woord opgejaag.

Die tyd is nou verkeerd om dit te doen.

Doep du Plessis, leier van die Suidlanders in die Vrystaat, het by navraag bevestig die woord “uhuru” word deur hulle verbind met “totale vryheid”, die nag van die lang messe en operasie Iron Eagle, wat glo dieselfde sou beteken.

Oorsprong:Nuus24

Vir meer artikels, raadpleeg asseblief die argiewe en soekenjin in die sykolom.
For more articles, please use the archives section or search engine in the sidebar.