SA gesin verlaat hul Zim-plaas

2010-01-08 00:03

Sarel van der Walt

Die Suid-Afrikaanse egpaar vir wie plaasbesetters sedert verlede naweek dreig op hul Zimbabwiese plaas, het die plaas gistermiddag verlaat.

Mnr. Dolf du Toit (66), sy vrou, Alida (61), en hul seun, Rudolph (38), het gisteraand by vriende sowat 25km van hul plaas tuisgegaan ná ’n week van drama.

Mnr. Rudolph du Toit was vir meer as ’n dag in die Du Toits se plaashuis op hul plaas in die Nyazura-distrik, sowat halfpad tussen Harare en Mutari in die oostelike hooglande, vasgekeer.

Plaasbesetters het hom eers gistermiddag toegelaat om die huis te verlaat. Die plaasbesetters het ook die Du Toits se klere aan hulle oorhandig en hulle aangesê om die plaas te verlaat.

Die plaasbesetters het verlede Saterdagoggend vir die eerste keer by die plaas opgedaag en geëis dat hulle die plaas oorhandig aan die “ware eienaar” – ene brig. Innocent Chiganze van die Zimbabwiese lugmag.

Die Du Toit-egpaar is vroeër vandeesmaand deur van die plaasbesetters aangerand, maar nie ernstig beseer nie.

Mnr. Dolf du Toit het laat gistermiddag aan Beeld gesê hy en sy vrou was eergisteroggend dorp toe. “Toe ons terugkom, het ek my voorman raakgeloop. Hy het geskree ek moet ‘ry, ry, ry!’, want die plaasbesetters was by die plaashuis en Rudolph daarin vasgekeer.”

Die Du Toits is terug dorp toe om die polisie te vra om te kom help, maar dié wou nie. “Ons het toe ons ambassade in Harare gebel. Dié het ’n mnr. Simmins hierheen gestuur. Hy het alles in sy vermoë gedoen, maar eerstehands ons frustrasies met die polisie hier ervaar.

“Hy kon wel reël dat die polisiehoof in Mutare beveel dat die polisie saam met ons uitkom plaas toe.

“Rudolph was vanoggend (gisteroggend) nog in die huis vasgekeer en ons het gevra hy moet toegelaat word om uit te kom. Ons wou ook ons klere hê.

“Alida (mev. Du Toit) is toestemming gegee om in te gaan en die klere te gaan haal, maar ek kon nie, want ek was glo te cheeky,” het Du Toit vertel. “Rudolph is toegelaat om uit te kom. Hy is ’n bietjie getraumatiseer.”

Chiganze het later self by die plaas opgedaag. “Toe hy my beeste sien, het hy gesê hy belowe hy sal na na hulle omsien. Hy het ook onderneem dat hulle niks uit my twee huise of my werkwinkel sal dra nie en gesê ‘ons kan verder onderhandel’.”

Die besettings kom slegs enkele weke nadat Suid-Afrika en Zimbabwe ’n handelsooreenkoms onderteken het wat Suid-Afrikaanse boere die reg gee om op vergoeding aan te dring as hul grond onwettig oorgeneem word.

Mnr. Charles Taffs, visepresident van die Zimbabwiese Commercial Farmers’ Union (CFU), het vroeër in ’n verklaring gesê landwyd word 152 van die oorblywende 300 kommersiële plase in die land geteiken. Volgens hom is daar inligting dat mnr. Didymus Mutasa, ’n voormalige Zimbabwiese minister van grondsake, agter van die besettings sit.

- Beeld

Oorsprong:Beeld
http://www.beeld.com/Content/Suid-Afrika/Nuus/1928/997482c2676946c2ac8f165f588a1a73/08-01-2010-12-03/SA_gesin_verlaat_hul_Zim-plaas

Eers brand huis en toe word sy geskiet

2010-05-17 22:15
Buks Viljoen

’n Vrou is die naweek op ’n plaas buite Carolina in die been gewond, net meer as ’n maand nadat haar houthuis aan die brand gesteek is.

Me. Cornelia de Wet (32) was omstreeks 12:30 in een van die skaapkrale op die plaas Kwaggafontein toe sy ’n skoot gehoor klap het.

Sy het ’n brandpyn aan haar been gevoel en gesien haar regterkuit bloei.

Haar broer, mnr. Jan de Wet, het gesê hulle vermoed ’n geweerkoeël wat van ver af geskiet is, het sy suster gewond.

Me. De Wet is ná behandeling in die provinsiale hospitaal in Carolina ontslaan.

Volgens haar broer is dit die vyfde keer sedert die brand op die plaas op 17 April dat misdadigers hulle teiken.

Sy en haar dogters, Cornelia (11) en Joey (2), het dié aand in die houthuis geslaap toe sy van die rook wakker geword het.

Sy kon nie die deur oopmaak nie omdat iemand die slot met ’n stuk draad toegebind het.

Toe sy per radio hulp van haar ouers, mnr. Jan en mev. Nelie de Wet, in hul opstal sowat 50 m daarvandaan vra, het die aanvallers op dié twee losgebrand.

’n Oor-en-weer-skietery van byna twee uur het gevolg voordat ander hulp op die plaas opgedaag het.

Mnr. De Wet jr. het gesê sedert die brand is daar verskeie kere by store op die plaas ingebreek en die voertuie op die plaas is onlangs ook beskadig.

“Iemand wil ons van ons familieplaas afdwing, maar ons weet nie wie nie. Ons plaas is die enigste in die hele gebied waarop daar nie ’n grondeis is nie.”

Volgens hom weier die polisie om ’n klag te ondersoek.

Konst. Isaac Aphane, polisiewoordvoerder, het gister bevestig hulle is bewus van die voorval.

“Ons was op die plaas, maar het nie ’n klag geregistreer nie omdat die klaer nie weet wie haar beseer het nie.”

Oorsprong:Beeld
http://www.beeld.com/Suid-Afrika/Nuus/Eers-brand-huis-en-toe-word-sy-geskiet-20100517

Boer (23) in hegtenis geneem wat plaasaanvaller ontwapen

BOER IN HOF: Mnr. Chris Grobler, links, van die plaas Labri in die Kroonstad-omgewing, en sy plaasvoorman, mnr. Eugene Lloyd, is gister op borgtog van R500 elk vrygelaat. Foto: Johan Brits

2010-03-17 00:53

Charles Smith

’n Jong boer van Kroonstad wat ’n plaasaanvaller ontwapen het wat hom met ’n mes aangeval het, is gister summier deur die polisie 48 uur lank toegesluit omdat die aanvaller gaan kla het.

Mnr. Chris Grobler (23) se ouers het teen gister laat alles probeer om hom voor donker uit die polisieselle op Koppies vrygelaat te kry. Die chaotiese regstelsel het hulle erg belemmer. Hy en sy plaasvoorman, mnr. Eugene Lloyd, is saam in die selle aangehou. Die mede-aangehoudenes het teen 20:00 begin om teen hulle te toi-toi.

Mnr. Christo Grobler het gesê drie prokureurs het hul bes gedoen om sy seun vrygelaat te kry. Toe was die polisiebeampte met die dossier soek en daar was kwansuis géén inskrywing in die voorvalleboek dat die polisie hul plaas Saterdag besoek het nie.

Sy vrou, Alta, het toe van hul plaaswerkers gaan haal om verklarings by die Heuningspruit-polisiekantoor af te lê dat hulle – dié einste polisiebeamptes – wél Saterdag op hul plaas was.

Chris het die polisie Saterdag laat kom toe ’n gewese plaaswerker, wat ses maande gelede afgedank is nadat hy motorbatterye gesteel het, moles op die plaas Labri gemaak het.

Die polisie het die man wel verwyder.

Sondagaand was die man terug – dié keer erg aangeklam. Toe Chris hom wegwys, het hy ’n mes uitgepluk en na Chris gesteek. Die jong boer het die mes afgevat en die aanvaller het hard met moederaarde kennis gemaak, het Grobler sr. gisteraand gesê.

Die polisie is weer gebel, maar hulle het nooit uitgekom nie. Die aanvaller se arm is glo beseer en hy het by die polisie gaan kla. Maandag het twee konstabels op die plaas opgedaag.

“My vrou wou weet hoekom hulle nie Sondag opgedaag het nie. Een konstabel het vir haar gesê sy moet haar nie ‘wit hou’ nie.

“Die bevelvoerder van die Heuningspruit-polisiekantoor het vir my gesê as Chris stilgestaan het dat hy raakgesteek is, was die aanvaller in die selle en nie hy (Chris) nie.”

Chris is gevra om gister ’n verklaring by die polisiekantoor te gaan aflê. Hy en Lloyd is kort daarna in hegtenis geneem en in die polisieselle op Koppies toegesluit. Volgens die polisie hier moet hulle ’n “verpligte” 48 uur opgesluit word, al is geen klag teen hulle ingedien nie.

Grobler sr., wat die week op Lichtenburg is, het alles moontlik probeer doen om sy seun vrygelaat te kry.

Sy vrou en Chris se lewensmaat, Angelique, en hul baba van ses maande, Chris, is alleen op die plaas.

“My vrou het die landdros op Koppies gaan sien, die deur toegetrek en sy hulp gevra omdat hulle vrou-alleen op die plaas is.

“Hy het gesê sy hande is afgekap. Ons probeer alles in ons vermoë. Ek weet nie wat in die land aangaan nie.”

Kapt. Msisitheki Selima, woordvoerder van die polisie op Kroonstad, het die voorval aan Johan Brits bevestig.

Hy sê “twee wit mans” het die klaer aangerand.

Gee jou mening oor hierdie gesprek - lewer hier kommentaar of stuur `n brief na cornelia.vdmerwe@volksblad.com.

- Volksblad

Oorsprong:Volksblad
http://www.volksblad.com/Content/Suid-Afrika/Nuus/2114/a4d8f29425584edf86d3eee442d8be9a/17-03-2010-12-53/Boer_%2823%29_in_hegtenis_geneem_wat_plaasaanvaller_ontwapen

Boer glo as 'wit hond' uitgeskel

Boer glo as 'wit hond' uitgeskel

Jan 08 2009 07:52:57:463AM - (SA)

Tom de Wet

Welkom. - In nóg 'n voorval van beweerde polisie-wreedheid en swak dienslewering op Odendaalsrus in die Vrystaat is 'n bejaarde boer na bewering deur polisiebeamptes as 'n "wit hond" uitgeskel en aan hom is ook glo gesê dat "alle wit honde in Suid-Afrika doodgemaak sal word".

Beeld se susterskoerant Volksblad berig reeds weke lank oor klagtes uit die gemeenskap oor swak dienslewering deur die polisie op dié dorp wat glo selfs al gestaan en toekyk het hoe 'n vrou wreed deur die pa van haar kind aangerand word, ondanks 'n gesinsgeweldinterdik.

Mnr. Rudi van Vuuren het reeds die nuwe stasiekommissaris, sr.supt. M.B. Mbongo, oor die gebeure Saterdag op sy pa, mnr. Gert van Vuuren (68), se plaas gaan spreek. Hy is aangeraai om 'n klag teen die betrokke polisiebeamptes in te dien.

Van Vuuren (sr.) was baie jare hoof van die polisie se reservistekorps op Odendaalsrus.

Van Vuuren (jr.) sê drie polisiebeamptes het Saterdag omstreeks 14:00 met 'n polisievoertuig op die plaas Hilton aangekom. Hulle het vir sy pa gesê hulle bring R100 wat 'n vorige plaaswerker hom skuld.

Een van hulle wou by hom weet waarom hy geld van 'n arm man wou hê, waarop hy geantwoord het dat dit geld is wat die man hom skuld.

Van Vuuren (sr.) is daarna deur een van die konstabels as 'n rassis uitgeskel en sy (Van Vuuren se) ma is ook gevloek. Van Vuuren (sr.) het hulle aangesê om die plaas onmiddellik te verlaat, waarna hulle vuurwapens uitgeruk en Van Vuuren (sr.) glo as 'n wit hond uitgeskel is. Hulle het daarna gery.

Later was hulle egter terug en Van Vuuren (jr.) se ma het hom gebel. Met sy aankoms op die plaas het die polisieman na bewering weer sy ouers en suster geskel. Hulle het probeer wegry toe hy opdaag, maar hy het voor hulle stilgehou en pen en papier gevat om hul name te kry.

Hulle het eers lank geweier om hulself te identifiseer, maar nadat hy aan hulle gesê het dat hy 'n majoor in die kommando was en sy regte en die wet ken, het die passasier homself as konst. Mokwena geïdentifiseer, en die bestuurder van die voertuig, wat glo die skelwerk gedoen het, het homself as konst. Mafabatho geïdentifiseer.

Van Vuuren (jr.) het daarna verskeie keer onsuksesvol die polisiekantoor op die dorp en 10111 gebel in 'n poging om klagte teen die betrokke polisiemanne in te dien en hulle van die plaas weg te kry.

Terwyl hy op die telefoon besig was, het Mafabatho gesê Van Vuuren kan Welkom, Bloemfontein en Pretoria bel, niemand sal of kan enigiets aan hom (Mafabatho) doen nie.

Nadat hy sy voertuig weggetrek en die polisiemanne beveel het om die plaas te verlaat, het hulle geweier en gesê hulle wag op versterkings.

Die versterkings, in nie minder nie as agt polisievoertuie, het daarna opgdaag.

Toe Van Vuuren daaroor navraag doen, is vir hom gesê dat hulle daarheen ontbied is. Hulle is glo (verkeerdelik) ingelig dat 'n plaaswerker op die plaas deur die boere aangerand word en dat die polisie wat die man wou help daarna aangeval, gevloek, met vuurwapens gedreig en die honde op hulle gesit is.

Van Vuuren (jr.) sê hy wil onder meer weet waarom daar nou klagte van regsverydeling en crimen injuria teen hom en sy pa ondersoek word. Hy wil ook weet wat die polisie met private aangeleenthede soos die bring van die R100 te doen het en dit boonop in 'n polisievoertuig terwyl hulle aan diens is.

Supt. Sam Makhele, provinsiale woordvoerder van die polisie, sê mense moet met hul klagtes eerste na die stasiekommissaris gaan waarna dit deur die regte kanale hanteer sal word.

Die polisiebestuur verstaan die erns van die bewerings, maar daar moet klagte teen polisiebeamptes wat dalk oortree, ingedien word sodat dit behoorlik ondersoek kan word.

Oorsprong:Beeld
http://www.news24.com/Beeld/Suid-Afrika/0,,3-975_2450135,00.html

Brief dreig boer met dood waar plaashuis brand

Die brief

2010-05-07 21:55
Buks Viljoen

Nelspruit. – “Jy gaan net soos Eugene blanche (sic) volgende wees ... jy gaan vermoor word!”

Dit is die woorde in ’n brief wat dié week opgetel is op die plaas van mnr. Dave Mortlock (53) van die plaas Dustin in die Brondal-omgewing buite Nelspruit.

Mortlock het Maandag skade van sowat R3 miljoen gely toe sy spoghuis op die plaas afgebrand het.

’n Werker het die brief naby die afgebrande huis opgetel.

Volgens Mortlock se seun, Roger, is daar aanvanklik vermoed ’n elektriese kortsluiting het die brand veroorsaak.

Mortlock sr. het die huis Maandag omstreeks 09:15 verlaat.

Skaars ’n halfuur later het ’n werker hom gebel en gesê die huis brand.

’n Werker, wie se naam nie bekend is nie, het die brief Woensdagoggend, twee dae ná die brand, langs ’n paadjie tussen die huis en die kampong opgetel.

Die moontlikheid van brandstigting word nou ondersoek.

Forensiese kundiges van die polisie is eergister ingeroep om die presiese oorsaak van die brand te bepaal.

Volgens Mortlock jr. leef hulle in vrees sedert die brief gekry is.

In die brief word hoër lone, ’n minimum loon van R1 800 en beter werkomstandighede geëis.

Die briefskrywer(s) kla ook omdat Mortlock Mosambiekers en Zimbabwiërs in diens het.

In die brief sê die skrywer Mortlock het vier dae om die plaas te verlaat of hy gaan vermoor word.

Later word gesê hy het twee weke om die plaas te verlaat.

Verskeie van die plaaswerkers is gister ondervra, maar daar is geen aanduiding dat hulle iets van die brief of die brand weet nie, sê mnr. Danie Coetzer, bestuurder van J&M Sekuriteit in Witrivier, die maatskappy wat Mortlock se plaas beveilig.

Hy sê die werker wat die brief opgetel het, het dit aan Mortlock gegee. Die brief is toe aan die polisie gegee.

Coetzer sê hulle vermoed die brief hou verband met ’n grondeis op verskeie plase in die Brondal-gebied.

“Ons weet van ten minste een eiser wat bitter is omdat sy eis onlangs van die hand gewys is.”

Ao. Dawie Pretorius, woordvoerder van die polisie in Nelspruit, het bevestig dat hulle aanvanklik net ’n klag van brandstigting ondersoek het.

“Ons het egter Woensdag die klag van intimidasie bygevoeg toe die brief opgespoor is,” het hy gesê.

Oorsprong:Beeld
http://www.beeld.com/Suid-Afrika/Nuus/Brief-dreig-boer-met-dood-waar-plaashuis-brand-20100507

Aanval op plaas naby Ventersdorp

Nooddienswerkers van ER24 neem mnr. Karel Griessel (49) na die ongevalle-afdeling kort nadat hy per helikopter by die Netcare Milpark-hospitaal in Johannesburg aangekom het. Foto: Herman Verwey

2010-04-18 22:27
Amanda Roestoff

’n Boer van Syferbult buite Ventersdorp in Noordwes is gisteroggend in ’n plaasaanval in die been geskiet en herhaaldelik met ’n mes gesteek.

Dit het gebeur skaars 16 dae ná die moord op mnr, mnr. Eugène Terre’Blanche, AWB-leier, op sy plaas aan die ander kant van dié dorp.

Mnr. Karel Griessel (49), wat die afgelope 20 jaar ’n gemengde boerdery buite Ventersdorp op die Potchefstroompad bedryf, is omstreeks 05:00 by sy kombuisdeur geskiet.

Hy het die deur oopgemaak om ’n been vir een van sy honde te gooi toe drie mans op hom toegesak en een hom in die been geskiet het.

Sy twee dogters (12 en 17 jaar oud) het elders in die huis geskuil terwyl die ouer dogter haar ma, wat op ’n plaas sowat 2?km verder woon, per selfoon laat weet het.

Me. Carina Griessel (46), ’n hoenderboer en die eienaar van ’n boetiek in Potchefstroom wat onlangs van mnr. Griessel geskei is, sê die aanslag op haar eksman se lewe is “soos enige aanval of moord ... ”?“Dit gaan nie goed af nie.”

Sy het aan Beeld gesê haar oudste dogter het haar kort voor 05:00 gebel en gesê: “Mamma moet asseblief gou kom ... Hier is vreemde mense op die plaas.” Sy wou om veiligheidsredes nie haar kinders se name verstrek nie.

Dié ma van drie (sy het ook ’n seun van 19) het haar rewolwer gevat en haar saam met haar voorman en ’n oud-polisieman na mnr. Griessel se plaas gehaas terwyl hulle ander boere in die omgewing ontbied het.

Die aanvallers het vermoedelik in die tuin weggekruip toe hulle opgedaag het.

Een van die mans saam met haar het twee van die aanvallers verby die kombuisvenster sien hardloop.

Hy het twee skote op die aanvallers geskiet, wat weggehardloop het.

Toe nóg ’n boer van die omgewing opgedaag het, het die derde aanvaller hom uit die voete gemaak, het lt.kol. Lesego Metsi aan Sapa gesê.

Mev. Griessel het mnr. Griessel op die kombuisvloer aangetref. Die impak van die skoot wat hom getref het, het vermoedelik sy been gebreek, sê sy. Hy het ook kopbeserings opgedoen nadat hy herhaaldelik oor die kop geslaan is.

Sy sê die aanvallers, wat almal handwapens gehad het en een ook ’n mes, het mnr. Griessel bestorm toe hy die deur oopgemaak het.

“Hulle wou geld en wapens hê. Hy het (dit) nie by hom gehad nie. Toe wou hulle hom vasbind en hy het teëgestribbel.”

Mnr. Griesel is in die daaropvolgende stoeiery aangerand en volgens paramedici ook verskeie kere met ’n mes gesteek.

“Ons het handdoeke onder sy kop gesit en hom bly ondersteun totdat die paramedici opgedaag het. Hy het baie pyn in sy been gehad.”

Mnr. Werner Vermaak, woordvoerder van ER24, sê die pasiënt is vir verskeie steekwonde in sy been en ’n gebreekte been behandel.

Hy is per helikopter na die Netcare Milpark-hospitaal in Johannesburg vervoer waar hy in ’n ernstige, maar stabiele toestand is.

Me. Erin Smylie, hospitaalwoordvoerder, kon gisteraand nie kommentaar lewer op Griessel se toestand nie. “Ek het nog geen amptelike verslae van die dokters ontvang nie. Die hospitaal sal môre (vandag) besluit of hulle ’n verklaring sal uitreik.”

Besoekers uit die omgewing was gister duidelik emosioneel en ontsteld oor die aanval.

“Hulle wil ons grond hê! Hulle wil ons uit die land jaag. (Julius) Malema (die ANC-jeugligaleier) word gebruik om jeugdiges aan te hits.

Ons (die boere) gaan nie stilsit nie ...” het een boer, wat nie sy naam genoem wou hê nie, aan Beeld gesê.

Niemand is nog in hegtenis geneem nie.

Oorsprong:Beeld
http://www.beeld.com/Suid-Afrika/Nuus/Aanval-op-plaas-naby-Ventersdorp-20100418

SA boer in tronk oor hy nie gesin wil agterlaat

2010-04-16 07:36

André le Roux, Beeld
Media24-Afrika-kantoor

’n Suid-Afrikaanse boer is Donderdag aan die Zimbabwiese kant van Beitbrug in ’n polisiesel gegooi.

“Oorlogveterane” het vroeër die dag op nog twee Suid-Afrikaanse plase beslag gelê.

Albei behoort aan Ian Furguson, wat tans ná ’n operasie in Pretoria herstel.

Een van sy seuns, Ian Furguson jr., is Donderdagmiddag op die een plaas in hegtenis geneem en na die Beitbrug-polisiekantoor geneem nadat hy geweier het om die plaas sonder sy gesin te verlaat.

Sy drie kinders, van tussen vier en tien jaar oud, is steeds op die plaas wat deur militante beset word. Hul ma is op besoek aan Bulawayo en kon nie na die plaas terugkeer nie.

Polisiebeamptes het Furguson jr. na die aanklaer in Beitbrug geneem, maar dié het geweier om hom van enige misdaad aan te kla.

Hy is nogtans in ’n sel gegooi waar hy Donderdagaand moes oornag. Sy kinders is in die sorg van ’n werktuigkundige en sy vrou wat steeds op die plaas is.
Hulle moet egter vandag weg wees, het die militante gedreig.

Furguson jr. het Donderdag vanuit Zimbabwe aan Beeld gesê: “Die nuwe moeilikheid het begin ná die suksesvolle hofsake in Suid-Afrika (deur AfriForum).”

Dié keer is daar egter sterk aanduidings dat AfriForum se suksesvolle regsoptrede in Suid-Afrika en die beslaglegging op Zimbabwiese bates in Kaapstad ’n opportunistiese beweegrede vir oorname van die oorblywende 5% van Zimbabwiese plase in wit hande deur militante Zimbabwiërs geword het.

Willie Spies, regsverteenwoordiger van AfriForum, het gesê: “Daar ís ’n verband tussen ons optrede en dié reaksie. Ons tree juis daarom baie omsigtig op.

“Dis ’n moeilike dilemma. Onthou, 95% van (wit) boere in Zimbabwe het reeds alles verloor. Ons kan nie ter wille van die oorblywende 5% niks doen nie.”

In die jongste voorval is die Furgusons se lemoenplaas, waarop Furguson jr. boer, én ’n aangrensende jagplaas van 17 500 ha met ’n geraamde waarde van R88 miljoen beset.

Dit is net 46km van Beitbrug.
“Daar is meer wild op die plaas as in enige ander plek in Zimbabwe,” het Furguson sr. gesê.

In ’n vorige aanval is twee van die jagplaas se luukse lodges, wat vir buitelandse jagters in stand gehou word, deur plaasbesetters gestroop.

-Beeld

Oorsprong:Nuus24
http://www.nuus24.com/Suid-Afrika/Nuus/SA-boer-in-tronk-oor-hy-nie-gesin-wil-agterlaat-20100416

Boer vir 48 uur in selle nadat hy aanvaller ontwapen

2010-03-16 23:30

Charles Smith

’n Boer van Kroonstad wat ’n plaasaanvaller ontwapen het wat hom met ’n mes aangeval het, is gister summier deur die polisie vir 48 uur toegesluit omdat die aanvaller gaan kla het.

Mnr. Chris Grobler (23) se ouers het teen laat gister alles probeer om hom voor donker uit die polisieselle in Koppies vry te laat.

Mnr. Christo Grobler het gesê drie prokureurs het hul bes gedoen om sy seun vrygelaat te kry.

Toe was die polisiebeampte met die dossier soek en daar was kwansuis géén inskrywing in die voorvalleboek dat die polisie hul plaas Saterdag besoek het nie.

Sy vrou, Alta, het toe van hul plaaswerkers gaan haal om verklarings by die Heuningspruit-polisiekantoor af te lê dat hulle - dié einste polisiebeamptes - wél Saterdag op hul plaas was.

Chris het die polisie Saterdag laat kom toe ’n gewese plaaswerker wat ses maande gelede afgedank is nadat hy motorbatterye gesteel het, moles op die plaas Labri gemaak het.

Die polisie het die man toe verwyder. Sondagaand was die man terug - dié keer erg aangeklam.

Toe Chris hom wegwys, het hy ’n mes uitgepluk en na Chris gesteek. Dié het die mes afgevat en die aanvaller het hard met Moeder Aarde kennis gemaak, het Grobler sr. gesê.

Die polisie is weer gebel, maar hulle het nooit uitgekom nie.

Die aanvaller se arm is glo beseer en hy het by die polisie gaan kla.

Maandag het twee konstabels by die plaas opgedaag.

“My vrou wou weet hoekom hulle nie Sondag opgedaag het nie. Een konstabel het vir haar gesê sy moet haar nie ‘wit hou’ nie. Die bevelvoerder van die Heuningspruit-polisiekantoor het vir my gesê as Chris stilgestaan het dat hy raakgesteek is, was die aanvaller in die selle en nie hy (Chris) nie.”

Chris is gevra om gister ’n verklaring by die polisiekantoor te gaan aflê. Hy is kort daarna gearresteer.

Grobler sr. se vrou en Chris se lewensmaat, Angelique, en hul baba van ses maande, Chris, is alleen op die plaas.

“My vrou het die landdros in Koppies gaan sien, die deur toegetrek en sy hulp gevra omdat hulle vrou-alleen op die plaas is.

Hy het gesê sy hande is afgekap.

“Ons probeer alles in ons vermoë. Ek weet nie wat in die land aangaan nie.”

Oorsprong:Beeld
http://www.beeld.com/Content/Suid-Afrika/Nuus/1928/7dcc4d805165441e96688fb899260882/16-03-2010-11-30/Boer_vir_48_uur_in_selle__nadat_hy_aanvaller_ontwapen

Sakeman se oorskot skaars 1 km van sy verlate bakkie gevind

Jun 26 2009 09:09:45:493PM - (SA)

Marietie Louw-Carstens

Polokwane (Pietersburg). – Die oorskot van die vermoorde sakeman van Bela-Bela (Warmbad) in Limpopo is skaars ’n kilometer gekry van die plek waar sy verlate bakkie ná sy verdwyning gevind is.

Mnr. Giovanni (Johnny) Abbatemarco (58) se oorskot is Woensdag op sy plaas, Thaba Monate, buite Bela-Bela gevind.

Polisiehonde van Limpopo en Pretoria het die plaas etlike kere saam met spoorsnyers gefynkam sedert Abbatemarco se verdwyning in Februarie.

Sy erg ontbinde oorskot is egter eers vandeesweek in ’n vlak graf gevind.

’n Polisielid wat deel is van die ondersoekspan en anoniem wil bly, het gesê die plantegroei op die plaas is ruig. Daar is dele wat ook moeilik bereikbaar is en dis klipperig. “Ons weet nie hoekom die honde nou eers die lyk gekry het nie,” het hy gesê.

Abbatemarco was die eienaar van onder meer die Thaba Monate-landgoed, die Abba-wilds?plaas en ’n drankwinkel in Bela-Bela.

Hy is moontlik die aand van Vrydag 27 Februarie oorval op sy plaas, terwyl hy in sy viertrek Toyota-bakkie gery het. Die bakkie is die volgende oggend verlate naby ’n dam op die plaas gevind. Abbatemarco se selfoon, ’n mes wat hy altyd onder die bakkiesitplek gehou het en R8 000 wat hy in die bakkie gehad het, is glo gesteel. Polisieduikers het tot in die dam na Abbatemarco gesoek.

Mnr. Josias Mokubedi (35), ’n voormalige werknemer van Abbatemarco, is sowat drie weke ná sy verdwyning in hegtenis geneem. Mnr. Lucas Machaba (39), ’n vriend van hom, is ook aangekeer. Albei het weens roof en ontvoering in die Bela-Bela-landdroshof verskyn. Hulle is borgtog geweier, is nog in aanhouding en sal Donderdag ook op ’n klag van moord in die hof verskyn.

Geen begrafnisreëlings is nog getref nie.

Oorsprong:Beeld
http://jv.news24.com/Beeld/Suid-Afrika/0,,3-975_2533696,00.html

17-jarige in hof ná moord op boervrou

Jan 19 2009 11:19:28:650PM - (SA)

Buks Viljoen

’n Minderjarige seun wat op die plaas van die vermoorde boervrou mev. Saar Holtzhauzen (64) gewoon het, is verlede Vrydag vir haar moord in hegtenis geneem.

Holtzhauzen is voorverlede Sondag dood in die gang van haar huis aangetref.

Daar was ’n gapende wond aan haar keel. Die wond is waarskynlik met een van haar eie kombuismesse veroorsaak.

Die 17-jarige verdagte woon in ’n kampong (waar plaaswerkers woon) op Holtzhauzen se plaas Rietfontein, naby Alkmaar buite Nelspruit.

Hy het op ’n naburige plaas gewerk.

Hy is op dié plaas deur J&M Sekuriteit, wat verantwoordelik is vir die beveiliging van mev. Holtzhauzen se plaas, en die polisie aangekeer.

Die 17-jarige het die polisie na ’n huis in die Pienaar-woongebied naby Nelspruit geneem waar bebloede klere gevind is.

Die klere is vir forensiese ontleding gestuur om te bepaal wie se bloed daarop is, sê insp. Dawie Pretorius, polisiewoordvoerder.

’n Tweede verdagte, ’n Mosambieker wat in die huis naby Nelspruit woon, is steeds soek.

Hy is glo die naweek op ’n plaas naby die moordplaas opgemerk, sê mnr. Hendrik Botha van J&M Sekuriteit.

Die vermoede bestaan dat hy intussen na Mosambiek gevlug het.

Niks behalwe ’n rekenaar en die kombuismes is tydens die moordtog uit Holtzhauzen se huis gesteel nie.

Selfs haar selfoon was nog langs haar lyk en die geweerkluis se sleutel in haar hand.

Die 17-jarige het gister vlugtig in die hof op Nelspruit verskyn.

Oorsprong:Beeld
http://www.news24.com/Beeld/Suid-Afrika/0,,3-975_2455702,00.html

Bende val 80-jarige boer op plaas aan, roof vuurwapens

Dec 02 2007 09:21:40:513PM - (SA)

Marietie Louw-Carstens

Mookgophong (Naboomspruit). – Nog ’n bejaarde boer in Limpopo is die naweek op sy plaas aangeval en van vuurwapens beroof.

Mnr. Coen Seegers (80) is Saterdoggend op sy plaas, Kalkfontein, in dié distrik deur vier gewapende mans aangeval.

Dié aanval was ’n dag nadat mnr. Barend Jonker (85) Vrydag op sy plaas in die omgewing van Mokopane (Potgietersrus) met ’n byl aangeval is. Hy het ernstige beserings aan sy gesig en kop opgedoen en sterk steeds in die Polokwane- provinsiale hospitaal aan.

Landbou-organisasies in Limpopo is bekommerd oor die vlaag plaasaanvalle sedert einde Oktober.

Me. Marie Helm, streekbestuurder van TLU SA-Noord, het boere aangeraai om hul veiligheidsmaatreëls in die Kerstyd te verskerp.

In die aanval op Seegers is onder meer ’n haelgeweer en ’n jaggeweer gebuit.

Die vier gewapende mans het ook met ’n trommel geld gevlug.

Supt. Mohale Ramatseba, provinsiale polisiewoordvoerder, het gesê die vier verdagtes het omstreeks 08:00 glo vir Seegers gesê hulle wil melk koop.

Hy en sy vrou is oorrompel en die aanvallers het hulle vasgebind.

’n Groot polisiesoektog is na die aanvallers begin. Teen druktyd was niemand nog vasgetrek nie.

Intussen verskyn ’n 20-jarige man vandag in die landdroshof in Polokwane (Pietersburg) ná die aanval op Jonker.

Ramatseba het gesê die man is kort ná die aanval op ’n nabygeleë plaas in hegtenis geneem. Hy het glo ’n klein bedrag geld en klere by Jonker gesteel.

Nog ’n vermeende plaasaanvaller (27) verskyn vandag in die Louis-Trichardt-landdroshof weens die aanval op mnr. Callie Erasmus (54) op 7 November op sy plaas in die Levubu-distrik naby Louis Trichardt.

Erasmus is gewond tydens ’n woeste struweling, maar het daarin geslaag om die aanvaller aan te keer en sy hande met kabelhegters vas te bind.

Sedert einde Oktober was daar sewe gewapende plaasaanvalle in Limpopo.

Oorsprong:Beeld
http://www.news24.com/Beeld/Suid-Afrika/0,,3-975_2231579,00.html

‘My broer se gesig is fyngekap’

2010-04-04 22:21

Linda de Beer

Ventersdorp. – “My broer se gesig is fyngekap. Dit was ’n wrede moord.”

Dit was gister die woorde van mnr. Eugène Terre’Blanche se enigste broer, Andries, aan tientalle emosionele boere en lede van die AWB by die ingang na Terre’Blanche se plaas buite dié dorp.

Hy het boere gevra om môre in hul massas na die Ventersdorpse landdroshof op te ruk vir die verskyning van sy broer se twee vermeende moordenaars, wat glo vir hom gewerk het.

Die haatspraak teen boere deur mnr. Julius Malema, ANC-jeugligaleier, hou volgens Terre’Blanche se familie, boere en AWB-lede direk verband met die aanval op hom.

Terwyl die familie mense gemaan het om kalm te bly, het mnr. André Visagie, sekretaris-generaal van die AWB, prontuit verklaar dié organisasie gaan sy leier se dood wreek.

“Die AWB het besluit hy het geen ander keuse as om homself te bewapen en ons leier se dood te wreek nie,” het Visagie gesê. Tog het hy lede gemaan om vir eers “rustig” te bly sodat Terre’Blanche “in vrede” begrawe kan word.

Mnr. Nathi Mthethwa, minister van polisie, het geweier om hom oor ’n “politieke saak” uit te laat toe hy herhaaldelik gevra is oor Malema se uitsprake en of die regering enigsins optrede teen hom beplan.

“Kom ons bly kalm en laat die polisie toe om by die kern van die saak uit te kom,” het Mthethwa op ’n mediakonferensie in die raadsaal van die Ventersdorpse munisipaliteit gesê.

“Ek gaan nie by ’n politieke bespreking ingesleep word nie. Eugène Terre’Blanche is vermoor. Die polisie ondersoek hoekom dit gebeur het.”

Mthethwa en genl. Bheki Cele, nasionale polisiehoof, het Terre’Blanche se weduwee, Martie, by die egpaar se dorpshuis besoek voordat hy boere en ander familielede op die plaas te woord gestaan het.

Die media is nie toegelaat om die plaas te betree nie. Forensiese deskundiges was laat gistermiddag nog op die toneel besig.

Twee plaaslike polisielede het eergistermiddag laat op Terre’Blanche se verminkte lyk op sy bed in die opstal van sy plaas, Witrandjiesfontein, afgekom.

Dit was nadat die polisie ’n oproep oor ’n beweerde aanranding op die plaas gekry het.

’n Kapmes en ’n knopkierie is by die lyk gekry. Alle aanduidings is dat hy geslaap het toe hy aangeval is, het kapt. Adéle Rautenbach, polisiewoordvoerder in Noordwes, gesê.

Beeld het verneem ’n kapstok het in ’n ander vertrek in die huis omgeval gelê, terwyl dit ook gelyk het of daar met Terre’Blanche se wit Corsa-bakkie gepeuter is om dit te steel.

’n Venster van die huis is gebreek, maar die polisie het toegang verkry deur ’n deur wat nie gesluit was nie.

Die twee verdagtes, onderskeidelik 15 en 28 jaar oud, is kort ná die moord aangekeer waar hulle langs ’n grondpad in die distrik geloop het.

Terre’Blanche se selfoon is glo in hul besit gevind. Hulle is na verneem word gister teruggeneem na die toneel om uitwysings te doen.

Die boeregemeenskap het inligting verwerp dat ’n loongeskil die motief was. Daar was glo ’n woordewisseling tussen Terre’Blanche en die verdagtes oor agterstallige betaling.

“Hoe onderhandel jy met iemand as hy vas aan die slaap in sy bed is? Klim jy deur ’n venster om met iemand te onderhandel?” het ene Sean, ’n plaaslike boer, gesê.

Oorsprong:Beeld
http://www.beeld.com/Content/Suid-Afrika/Nuus/1928/a504e75b86e14ae2ac4d2f6e04d50ca2/04-04-2010-10-21/%E2%80%98My_broer_se_gesig_is_fyngekap%E2%80%99

Agt oorval boer, gesin op plaas

Me. Lorika Griessel, ambulans-assistent van Netcare 911, behandel MNR. KERNEELS CRONJÉ, boer van die plaas Doornlaagte buite Welkom, nadat hy op sy plaas oorval en aangerand is. Foto: Tom de Wet

2010-02-25 12:47

Tom de Wet

Welkom. – ’n Boer is in ’n ernstige toestand in die hospitaal nadat hy, sy vrou, dogter en ’n plaaswerker deur agt gewapende mans oorval en beroof is.

Mnr. Kerneels Cronjé (83) het veelvuldige beserings aan sy gesig en kop opgedoen toe hy by ’n beeskraal op die plaas met ’n stomp voorwerp, vermoedelik ’n ysterpyp, aangerand is.

Kapt. Stephen Thakeng, polisiewoordvoerder, sê agt mans met ’n geel Isuzu-bakkie het gister omstreeks 12:00 op die plaas Doornlaagte, 5 km buite Welkom, aangekom en voorgegee hulle wil beeste koop.

Cronjé en een van die plaaswerkers, mnr. David Mei (30), is saam met die mans na die kraal langs die plaashuis. Daar is die twee oorval, aangerand en vasgemaak.

Hulle is by die beeskraal gelaat terwyl die aanvallers na die huis is waar mev. Anna Cronjé (85) en haar dogter, Petro (53), oorval, aangerand en vasgebind is.

Van die rowers is toe terug na die kraal om Cronjé te gaan haal.

Terwyl Mei alleen was, het hy hom losgewoel en na ’n buurplaas gehardloop van waar die polisie ontbied is.

Die rowers, wat met drie handwapens gewapen was, het intussen ’n sleutel van die brandkluis in die huis gekry en twee pistole en ’n bedrag geld uit die Cronjés se kluis gebuit.

Hulle het daarna in hul bakkie weggejaag.

By die polisie se aankoms kort daarna is die vasgebinde vroue in die eetkamer gekry en losgemaak.

Die erg beseerde mnr. Cronjé is in ’n ander kamer gekry.

Mev. Cronjé is vir waarneming saam met haar man per ambulans na ’n hospitaal in Welkom gebring.

Oorsprong:Beeld
http://www.beeld.com/Content/Suid-Afrika/Nuus/1928/ab43da84b5ce43cb9f028e08dc117364/25-02-2010-12-47/Agt_oorval_boer,_gesin_op_plaas

4 mans verwoes my gesin in ’n sekonde

Dr. Duncan Prinsloo (regs) en mnr. Herman de Jager bring hulde aan hul familielede wat in twee plaasaanvalle vermoor is. Foto: lisa hnatowicz

2010-02-07 23:33

Hilda Fourie

“’n Wonderlike gesin is in een sekonde verwoes toe vier mans in ons kamer ingebars en sonder om ’n woord te sê, my vrou langs my doodgeskiet het.”

Só het ’n emosionele dr. Duncan Prinsloo eergister by Fort Schanskop in Pretoria tydens ’n gedenkdiens vir slagoffers van plaasaanvalle vertel van die nag toe hy en sy vrou deel van Suid-Afrika se misdaadstatistieke geword het.

Rowers het hulle op hul plaas by Vaalbank buite Bronkhorstspruit aangeval.

Dieselfde koeël wat sy vrou, Laetitia (54), se dood veroorsaak het, het Prinsloo (62) in die rug getref en hom verlam gelaat.

Mev. Prinsloo is een van sowat 2 000 mense wat sedert 1994 in plaasaanvalle dood is.

“Ek loof God dat ek vandag voor julle kan staan, al is dit wankelrig,” het Prinsloo, wat sukkel-sukkel met ’n kierie oor die weg kom, gesê.

“As dit nie was vir die genade van die Here wat jou moed gee om voort te gaan nie, sou ’n mens maklik ná só ’n voorval gaan lê.”

Volgens Prinsloo strek die implikasies van wat met hom en sy gesin gebeur het veel verder as dat hy sukkel om te loop.

Benewens die emosionele skade wat sy jongste dogter opgedoen het toe sy dié nag haar ma dood in haar bed en haar pa verlam op die vloer gekry het, is hy ook nie meer die hardwerkende, gesonde veearts met ’n praktyk wat veral boere bedien het nie.

Sowat 45 mense wat op sy plaas woon en in sy praktyk werk, word ook deur moontlike werkloosheid in die gesig gestaar omdat hy nie meer sy werk ten volle kan doen nie.

Prinsloo beoog om sy plaas te verkoop omdat hy dit nie meer kan behartig nie.

Verder leef Prinsloo in sy huis op die plaas wat hy wil verkoop soos ’n gevangene omdat dit soos ’n tronk lyk.

“As jy in die nag buite toe gaan, is die vrees in jou. Jy kan nie deur slaap nie, want as jy ’n geluid hoor, is jy wakker.”

Prinsloo het gesê as hy ooit weer ’n onbekende man in sy huis kry wat hom bedreig, sal hy skiet. “Daar word van my verwag om daardie tyd van die oggend vir ’n inbreker te vra wat hy in my huis soek.

“Die antwoord wat ek sal kry, is hoogs waarskynlik ’n koeël,” het Prinsloo gesê.

Mnr. Herman de Jager, wie se pa, Piet (65), in September 2003 op sy plaas Laatsgevonden in Levubu doodgeskiet is, het by dieselfde geleentheid gesê hy hoop dat hy eendag die mans wat sy pa vermoor het, kan vergewe sodat hy ook vergewe kan word vir die haat wat hy in hom dra.

- Beeld

Oorsprong:Beeld
http://www.beeld.com/Content/Suid-Afrika/Nuus/1928/43faa38b8f51468886eeb545af21818a/07-02-2010-11-33/%E2%80%984_mans_verwoes_my_gesin_in_%E2%80%99n_sekonde

Met panga doodgekap

2009-12-23 04:22

Buks Viljoen

’n Boer het magteloos met sy hande vasgebind aan die bad se handvatsel gehang terwyl hy eergisternag in sy vrou se arms in hul plaasopstal naby Louis Trichardt dood is.

Vier aanvallers het mnr. Pieter Snyman (in sy laat 50’s) ten aan- skoue van sy gesinslede verskeie kere met ’n panga teen die kop gekap en met ’n mes in die bors gesteek.

Die vier, gewapen met jagmesse en ’n panga, het mev. Jeanine Snyman (50) en die egpaar se dogter Sharon (12) omstreeks 18:30 in hul huis op die plaas Balmoral, naby Mara, oorval.

Volgens mnr. Japie van der Goot, veiligheidshoof van die Vivo/Alldays-gebied van TLU SA Noord, is die twee verskeie kere aangerand en vasgebind.

“Die aanvallers het Afrikaans met hulle gepraat en gesê hulle weet mnr. Snyman was in daardie sta­dium elders op die plaas om ’n pomp af te sit.”

Kort daarna het mnr. Snyman, alombekend as “Pieter Slang” vanweë sy liefde vir slange, opgedaag. Hy is ook vasgebind.

Die moordenaars het hom na die badkamer gesleep waar sy vrou en Sharon aangehou is.

Snyman se dogter Tracy (30), wat ook op die plaas werk, was besig om arbeiders by hul kampong af te laai.

By haar terugkeer is sy ook oorval, vasgebind en saam met die res van die gesin in die badkamer aangehou. Die rowers het geld en wapens geëis en mnr. Snyman verskeie kere met die panga gekap.

Hulle het die gesin later in die badkamer toegesluit en die huis deurgesoek.

Mev. Snyman het haar erg beseerde man in haar arms vasgehou totdat hy dood is, het Van der Goot gesê.

Die drie getraumatiseerde vroue kon hulself eers teen 22:00 bevry en op ’n naburige plaas gaan hulp soek.

By die polisie se aankoms op die plaas het hulle glo geweier om eerste by die opstal in te gaan en gevra boere wat op die toneel was, moet die huis eers deurkyk.

Snyman se lyk is in die badkamer gekry met gapende wonde aan sy kop. Sy hande was steeds aan die bad vasgemaak.

Daar is vasgestel twee skootrekenaars, ’n TV-stel en Snyman se Toyota-bakkie is weg. Die kluise is ook oopgebreek. Van die vuurwapens is net so daarin gelaat.

Die bakkie is later verlate in ’n plakkerskamp buite Polokwane (Pietersburg) gekry.

Supt. Ronel Otto, polisiewoordvoerder, het gesê niemand is nog aangekeer nie. Die moordenaars is volgens haar tussen 20 en 30 jaar oud.

Mev. Snyman en die dogters bly sedert die aanval by ’n buurman en kry berading.

Mnr. Jan Viljoen, voorsitter van TLU SA Noord, het gesê die geweld van die moord is skokkend. Hy het die moordenaars as “sosiale terroriste” beskryf.

“Die regering se siening dat dié tipe misdaad gewoonlik deur buitelanders gepleeg word, is verkeerd bewys aangesien die moordenaars, wat Afrikaans goed praat, plaaslike mense met kennis van die omgewing is.”

- Beeld

Oorsprong:Beeld
http://www.beeld.com/Content/Suid-Afrika/Nuus/1928/9226f84f9dd54b33acb40c49399deb27/23-12-2009-04-22/Met_panga_doodgekap

Pa, seun kry elk byna R95 000

2009-09-01 00:40

’n Boer en sy seun wat in hegtenis geneem is ná ’n plaasaanval waartydens die boer ’n aanvaller geskiet het, moet elk skadevergoeding van bykans R95 000 kry.

Mnr. Cornelius Gabriël Volschenk (51), sakeman en boer van die plaas Morgenster naby Ermelo, en sy seun, Cornelis Gabriël (26), het skadevergoeding-eise teen die minister van veiligheid en sekuriteit ingestel.

Die plaasaanval was op Oukersdag 2001.

Volschenk sr. bedryf ook ’n meubelfabriek op die plaas.

Regter Lionel Sapire het gister in die hooggeregshof in Pretoria die minister gelas om R94 693 aan elke eiser, asook die eisers se koste, te betaal.

Luidens die eisers se hofstukke oor die bedrag van hul skadevergoeding is hulle “deur ’n groep swart mense” op dié plaas aangeval.

Volschenk sr. “het uit noodweer een van sy aanvallers met sy pistool raak geskiet nadat hy self reeds ernstig beseer is”.

Hy het die polisie daarna ontbied en sy volle samewerking aan hulle tydens hul ondersoek gegee.

Hy is desondanks “en ’n onderneming deur ene ass.komm. Dube” dat hy nie in verband met die voorval gearresteer sou word nie, op 11 Januarie 2002 saam met sy seun op die plaas gearresteer. Dit was “in opdrag van ene kapt. Fanie Molapo”.

Die mans is na die polisieselle by die Breyten-polisiekantoor geneem en omstreeks 22:00 dié dag op borgtog vrygelaat.

Luidens hul hofstukke was Volschenk sr. in ’n sel waar een van die aangehoudenes ’n mes “aanhoudend op die selvloer geslyp het”. Dit het hom erg geïntimideer en bekommerd gemaak oor sy seun se veiligheid weens dié se jeugdigheid en die feit dat hulle afsonderlik aangehou is.

Die hofstukke lui voorts dat Volschenk jr. die dag van die plaasaanval ’n waarskuwingskoot met sy pistool geskiet het toe twee mans sy pa se broer op sy pa se plaas aangeval het. Sy oom het om hulp geroep.

Hy het ook daarna sy samewerking aan die polisie gegee.

Toe hy afsonderlik van sy pa aangehou is, was hy bang vir die mede-aangehoudenes.

“Hy is verontrief en gewalg deur die toestand in die sel waarin hy en die ander mense aangehou is, naamlik ’n klein selletjie met ’n toilet in wat erg gestink het.”

- Beeld

Oorsprong:Beeld
http://www.beeld.com/Content/Suid-Afrika/Nuus/1928/d0a66a53e0254cac816a43d072b941c5/01-09-2009%2012-09/Pa,_seun_kry_elk_byna_R95_000

Hy’t geweet hy sterf, sê man se pel

Mar 10 2009 07:58:29:940PM - (SA)

Marietie Louw-Carstens

Polokwane (Pietersburg). – “Kobus, my ou maat, dit is hospitaalsake hierdie.”

Dit was mnr. Riaan van der Walt (44, van dié stad se laaste woorde net nadat hy die naweek koelbloedig geskiet is waar hy op ’n plaas naby Modimolle (Nylstroom) in Limpopo gestaan en vleis braai het.

Hy het dié woorde aan mnr. Kobus Krause, eienaar van die plaas waar hy op kort afstand met ’n gesteelde .308-jaggeweer doodgeskiet is, gesê.

“Ek het gesien sy arm bars oop en dat hy op die grond neersak.

“Ek het ook afgesak na hom, sy kop na my toe gedraai en toe rol sy oë om. . . hy was dood,” het Krause gister gesê.

Krause is ’n familielid van Van der Walt se vrou, Wilma, wie se verjaardag hulle met dié braai op die plaas gevier het.

Mnr. Job Herbst, plaasbestuurder, het gesê Van der Walt het ’n braaivurk in sy regterhand gehad. Sy linkerarm en hand was in die lug. Hy het moontlik iets beduie terwyl hy met van die ander gaste gepraat het toe hy getref is.

Een van ’n onbekende aantal aanvallers het omstreeks 21:30 die moordskoot uit ’n beboste gebied geskiet.

“Dit was verskriklik,” sê Herbst, wat nader gehardloop om te Van der Walt te help. “Dit was sekondes, toe is hy dood.”

Daarna het hy met sy geweer skote in die rigting waaruit Van der Walt geskiet is, begin vuur. “Ek is ’n baie parate mens en het die skote geskiet om die res van ons te beskerm.”

Hy het gesê die ander gaste het in die harwar die plaashuis ingehardloop.

Kapt. Malesela Mogale het gesê die geweer waarmee Van der Walt geskiet is, is op die plaas gekry. Dit is sowat drie weke gelede tydens ’n huisrooftog in Modimolle gesteel.

Herbst is ontstoke omdat die polisie hom Saterdag van omstreeks 15:00 tot 19:00 by die polisie se speurtakkantore ondervra het. Hy is ondervra omdat hy skote geskiet het in die rigting vanwaar Van der Walt se doodskoot gekom het.

“Ek mag nie eens alleen toilet toe gegaan het of gaan water gedrink het nie. ’n Polisielid was die hele tyd by my. My menswees is aangetas,” het Herbst gesê.

Ná 19:00 is Herbst terug plaas toe en volgens hom het die polisie hom tot Sondag omstreeks 20:00 onder huisarres geplaas. Krause het gister ook gesê die manier waarop die polisie vir Herbst behandel het, was onnodig.

Supt. Malesela Ledwaba, polisiewoordvoerder in Modimolle, het gesê Herbst is as deel van die ondersoek ondervra. Ledwaba het gesê niemand is nog weens die moord in hegtenis geneem nie.

Van der Walt word oormore om 14:00 uit die NG-Moedergemeente in Mokopane (Potgietersrus) begrawe.

Enigiemand met inligting oor die moord kan kapt. Malesela Mogale bel by 082 565 8606.

Oorsprong:Beeld
http://jv.news24.com/Beeld/Suid-Afrika/0,,3-975_2483170,00.html

Spogplaas nou vervalle

Bo, mnr. Sias Strydom se plaashuis drie jaar gelede. (Onder) Só lyk die huis nou.

14/02/2009 21:41 - (SA)

Willem Pelser

Hazyview

Skaars drie jaar gelede was mnr. Sias Strydom se familieplaas Altyd Beter naby Hazyview ’n spogplaas waarop enige piesangboer trots sou gewees het.

Toe die Giba-gemeenskap ’n grondeis teen die plaas ingedien het, was die piesangboorde, trekkers en pakhuise in so ’n goeie toestand dat die regering Strydom R3,2 miljoen vir die grond aangebied het.

Die piesangs het geil gegroei in dié vrugbare aarde en die drie huise op die plaas was pynlik netjies.

Toe neem die staat die grond oor. Aanvanklik het alles goed gegaan.

Die projek is destyds voorgehou as ’n voorbeeld van hoe grondhervorming in Suid-Afrika eintlik gedoen moet word om te slaag. Die geheim is samewerking tussen boer en grondeiser, is toe gesê.

Mediagroepe het joernaliste en fotograwe gestuur om na die suksesverhaal te gaan kyk. Maar binne drie jaar het dinge drasties verander.

Verlede week het Strydom self gaan gaan kyk hoe dit nou daar lyk.

“Wat ek gesien het, het my letterlik laat huil van ontsteltenis,” vertel Strydom die afgelope week.

Toe trekkers langs ’n piesangboord gebreek het, het die nuwe eienaars dit net daar gelos. Later is die stukkende trekkers vir onderdele gestroop – om te verkoop, óf om in ander trekkers te gebruik.

Toe die kweekhuise se dakke afgewaai het in ’n storm, is dit net so laat staan. Onderdele van die plaas se waterpompe, wat in Strydom se tyd die boorde gevoed het, is stuk-stuk weggedra.

Die netjiese vierslaapkamerhuis waar hy en sy gesin gewoon het, is erg verwaarloos. ’n Tweede huis, wat Strydom verhuur het, is nou ’n murasie.

Nagenoeg 37 ander boere in sy omgewing het ook aan die staat verkoop. Hulle is ruim vergoed: tussen R30 000 en R100 000 per ha.

Maar vir die meeste boere, soos Strydom, was dit nie genoeg om weer ’n boerdery van dieselfde kaliber elders te begin nie. Strydom het ‘n hoewe gekoop en ’n tuisnywerheid begin.

Die 1 500 plaaswerkers wat vir Strydom en die ander boere gewerk het, was die groot verloorders toe die grondeisers die plase oorgeneem het. Die meeste het hul werk verloor omdat die grondeisers die plase self wou bewerk, sê Strydom.

Die omstrede landboumaatskappy SAFM (South African Farm Ma-nagement) is in 2006 deur die regering aangewys om die 38 plase te bestuur. Die hele gebied se plase het toe bekend gestaan as een groot plaas Burgershall.

Die afgelope drie jaar het die hele projek met rassse skrede agteruitgegaan: SAFM het feitlik heeltemal in duie gestort en na bewering skuld dié maatskappy Absa meer as R100 miljoen.

Boonop het ’n dispuut tussen twee groepe grondeisers verlede jaar ontstaan oor wie presies die regmatige eienaars is van die 38 plase. Boerdery-bedrywighede en instandhouding het erg gekwyn.

Vandag sal dit R6 miljoen kos om sy eertydse plaas weer te herstel tot wat dit destyds was, sê Strydom.

Die Burgershall-grondeis wys presies wat verkeerd is met grondhervorming, sê dr. Theo de Jager, adj. pres. van Agri SA.

“Die regering moet ewe veel aandag skenk aan landbou-ontwikkeling as aan grondhervorming. Dis tog twee kante van dieselfde muntstuk,” sê De Jager.

Hy sê die staat hou hom bloot besig met die herverdeling van grond – sonder om aan die sake- of produksie-kant van die landbou te dink. Volgens De Jager is daar ook byna geen samewerking of sinergie tussen staatsdepartemente wat met landbou gemoeid is nie.

“Die verskillende departemente praat eenvoudig nie met mekaar nie. Elke week bel ’n staatsdepartement ons by Agri SA om te hoor wat sê ’n ander staatsdepartement hieroor of daaroor,” sê De Jager.

Met druktyd kon kommentaar nog nie verkry word van die kommissie op die herstel van grondregte in Nelspruit nie.

Oorsprong:Rapport
http://www.news24.com/Rapport/Suid-Afrika/0,,752-2460_2470100,00.html

‘Ontsnapte aanvaller’ slaan weer toe

May 07 2008 10:03:53:750PM - (SA)

Buks Viljoen

’n Werker is gister doodgeskiet en ’n boervrou beseer in ’n rooftog op ’n plaas in Mpumalanga waaraan ’n ontsnapte plaasaanval-verdagte glo deelgeneem het.

Mev. Helen Mcginn (45) van die plaas Kwaggafontein naby Carolina het teruggebaklei en ’n ongeluk veroorsaak in die motor waarin haar werker se moordenaars haar ontvoer het. Dit het waarskynlik haar lewe gered.

Mcginn het gister gesê dat drie mans omstreeks 07:30 by die plaas opgedaag het.

“Hulle was al Maandag hier en het gesê hulle wil skape koop. Hulle sou Vrydag terugkom.”

Hulle het egter gister weer opgedaag. Kort ná hul aankoms moes Mcginn Carolina toe gaan om Nicholas (7), haar seun, by die skool te gaan aflaai.

Sy en Nicholas woon alleen op die plaas waar sy met skape boer.

Met haar tuiskoms het sy na die skaapkraal gegaan waar mnr. Thulani Mthimunje (28) saam met die drie was.

“Die volgende oomblik het een ’n handwapen uitgepluk en Mthimunje in die bors geskiet,” het Mcginn gesê. Hy is op slag dood.

Die rowers het Mcginn na die plaasopstal gesleep waar hulle na geld gesoek het. Hul soektog is egter kortgeknip toe hulle ’n kas oopgemaak en op slange afgekom het.

“Ek hou koringslange en ander soorte, soos luislange, in die huis aan ter wille van ons eie veiligheid,” vertel Mcginn.

Die rowers kon net sowat R150 in die huis kry.

Hulle het Mcginn in haar Toyota Prado gedwing voordat hulle daarmee van die plaas af gevlug het.

“Toe een van hulle homself op my afdwing, het ek besluit om terug te veg.”

Sy het tussen twee van die rowers op die agtersitplek gesit. In die bakleiery het sy een van hulle so hard geskop dat hy tot voor in die voertuig geval en hard teen die bestuurder gestamp het. Die bestuurder het toe beheer oor die voertuig verloor en dit het gerol.

Sy is uit die voertuig geslinger en kon weghardloop en in die bosse gaan skuil.

Nadat die drie rowers weggehardloop het, het Mcginn ’n verbygaande voertuig voorgekeer.

Die polisie het later ’n .357 Magnum-rewolwer, die moordwapen, op die ongelukstoneel gekry. Dié wapen is twee weke gelede in ’n aanval op ’n bejaarde egpaar van Machadodorp gebuit.

’n Verdagte in daardie saak is kort na dié aanval gearresteer, maar het ’n week later ontsnap.

Oorsprong:Beeld
http://www.news24.com/Beeld/Suid-Afrika/0,,3-975_2318421,00.html

Werker skiet glo op plaasvrou

2010-04-22 02:51
Vicüs Bürger

’n Plaaswerker het na bewering ’n vrou op ’n plaas in die Reddersburg-distrik probeer doodskiet nadat sy hom daarvan beskuldig het dat hy drentel.

Me. Heilie Labuschagne (38) van die plaas Erasmusfontein het wonderbaarlik ongedeerd van die aanval afgekom.

Lt.kol. Thandi Mbambo, polisiewoordvoerder, sê Labuschagne het gisteroggend gereed gemaak om na Bloemfontein te vertrek.

Sy het haar handsak, waarin ’n .22-pistool was, in die Ford Ranger-bakkie, asook die voertuig se sleutel in die aansluiter gelos, terwyl sy gou iets in die huis gaan haal het.

Sy wou die agterdeur sluit toe ’n 18-jarige werknemer haar terug in die huis gestoot het.

Hy het haar na bewering twee keer probeer skiet met die pistool wat hy vermoedelik uit die bakkie gesteel het. Nie een skoot het egter afgegaan nie.

’n Ander werknemer het gesien wat gebeur en Labuschagne gaan help. Die jong man het na bewering toe ’n skoot op sy kollega afgevuur, maar hom gemis.

Hy het uit die huis gehardloop en in die bakkie gevlug.

Die polisie is oor die aanval ingelig en het naburige boere ontbied. Hulle is gevra om by alle uitgangsroetes wag te hou.

Sowat 10km van die plaas het ’n boer die vermeende aanvaller vasgetrek. Die vuurwapen is in sy besit gevind.

Die jong man is in hegtenis geneem en sal vandag in die Reddersburg-landdroshof op aanklagte van poging tot moord, asook diefstal van ’n voertuig en vuurwapen en ammunisie verskyn.

Mbambo sê in die ondersoek is gevind dat die verdagte sy werkgewer vermoedelik probeer skiet het omdat sy hom vroeër gekonfronteer het omdat hy drentel en nie werk nie. Die man het vier maande lank op die plaas gewerk.

- Volksblad

Oorsprong:Volksblad
http://www.volksblad.com/Suid-Afrika/Nuus/Werker-skiet-glo-op-plaasvrou-20100422

Huis met ma, kinders in aan brand gesteek

2010-04-19 21:58
Buks Viljoen

Aanvallers het die naweek ’n houthuis met ’n vrou en haar kinders daarin op ’n plaas naby Carolina aan die brand gesteek nadat hulle die deur met ’n stuk draad toegebind het.

Toe haar ouers die gesin te hulp snel, is daar op hulle geskiet.

“Hulle was daarop uit om ons te vermoor. Dié het niks met diefstal te doen nie,” het me. Cornelia de Wet (32) van die plaas Kwaggafontein naby Carolina gister gesê.

Sy het Saterdagnag omstreeks 22:00 wakker geword toe sy rook ruik. Sy het gesien die muur en gordyn in haar kamer brand.

Die aanvallers het diesel op die houthuis gegooi en dit toe aan die brand gesteek.

In die slaapkamer het sy ’n brandende CD gekry.

De Wet het vergeefs probeer om twee van haar kinders, Cornelia (11) en Joey (2), wat by haar op die dubbelbed geslaap het, wakker te maak.

“Die rook het hulle blykbaar bewusteloos gemaak.”

Sy het die vlamme aan die gordyn geblus en probeer om die huisie se deur oop te maak, maar kon dit nie regkry nie omdat dit met ’n stuk draad vasgebind was.

De Wet se ouers, mev. en mnr. Nelie (62) en Jan de Wet (65), woon in ’n plaasopstal sowat 50 m van De Wet jr. se huisie. Haar ander dogter, Sarah (8), het die aand by hulle geslaap.

De Wet jr. het oor ’n tweerigtingradio, wat skaars twee weke gelede geïnstalleer is, hulp by haar ouers probeer kry.

“Toe hulle uit die huis kom, is daar vanuit die donker op hulle losgebrand.”

Die ouerpaar het met ’n haelgeweer en pistool die donker in geskiet om die aanvallers te probeer verjaag.

De Wet jr. het gesê daar is ook op haar geskiet toe sy deur die kombuisvenster geleun het om die stuk draad om die deur se slot los te woel.

Die skietery het volgens haar byna twee uur lank geduur.

Pogings om die polisie in Carolina, sowat 12km van die plaas, in die hande te kry was aanvanklik vrugteloos omdat hulle nie die telefoon geantwoord het nie.

Sy het toe haar broer, mnr. Jan de Wet jr., wat naby Belfast boer, gebel.

Hy het na die plaas gejaag. “Toe ek daar aankom, het die skote steeds geklap,” het hy gesê. “Ek het aan hulle geskree ek gaan hulle vrekskiet!”

Hy het ook in die rigting van die aanvallers begin skiet. Die skietery het toe bedaar.

Mnr. De Wet jr. raam daar was tussen tien en 15 aanvallers.

“Die aanval was fyn beplan en hulle het voorbereid gekom en met genoeg ammunisie.”

Die polisie het 9mm- en haelgeweerdoppies en enkele patrone naby die huise opgetel.

Een van die koeëls was van ’n vreemde kaliber wat selfs vir die polisie onbekend is.

Die lang gras het die soektog na nog bewysstukke bemoeilik. Mnr. De Wet jr. het gesê voetspore is ook naby die toneel gevind.

Niemand is in die aanval beseer nie.

Oorsprong:Beeld
http://www.beeld.com/Suid-Afrika/Nuus/Huis-met-ma-kinders-in-aan-brand-gesteek-20100419

Boeregesin van Bfn meen polisie ‘terroriseer’ hulle

2010-04-16 00:12
Charles Smith

Bloemfontein . - ’n Boeregesin van Bloemfontein voel hulle word deur die polisie “geterroriseer” nadat die taakmag met ’n helikopter op hul plaas toegeslaan het om na wapens te soek wat glo van die weermag bekom is.

Die polisie moes die Saaiman-boerdery in Bainsvlei met rooi gesigte verlaat nadat die “wapens” slegs leë ammunisiekiste was wat hulle as toesluitkaste van die weermag vir hul werkers bekom het.

Die polisie het self erken niks wapens is gekry nie, maar vir die Saaimans is dit nie genoeg nie: Hulle voel hulle is voor hul werkers verneder en hul gesag is ondermyn. Boonop het niemand in die polisie om verskoning gevra vir die voorval nie.

Mev. Joan Saaiman eis ook dat die vier mense wat in hul tamatieland gelê en op hulle gespioeneer het deur die polisie vervolg word weens die valse verklarings wat afgelê is.

Sy, haar man, Piet, hul seun, Kobus, en skoondogter, Yolandi, is erg getraumatiseerd ná die volledige optrede Maandag waar met ’n helikopter op hul plaas geland is en hulle met vuurwapens gekonfronteer is. “Chaos” is veroorsaak en hul huishulp is selfs ondervra hoeveel uur sy per dag werk.

Inspekteurs van die departement van arbeid het ook verlede maand op die Saaiman-boerdery se aartappelverpakkingsaanleg met groot polisiebegeleiding toegeslaan.

Dié keer het die “spioene” hulle afgeloer toe ’n weermagvoertuig verlede Vrydag die leë ammunisiekiste afgelaai het. Drie dae later het die polisie van alle kante toegeslaan.

“Toe die polisie aankom en die hele sirkus aankom, het hulle seker gesien hoe verslae is hierdie dom boere. Ek sê toe: Here, moet dit weer gebeur? Hulle vernietig alle gesag wat ons het,” het mev. Saaiman gister aan Volksblad gesê.

“Ons word letterlik geteister en geterroriseer deur die polisie. Ons is al geteiken in ’n plaasaanval, maar toe ons die noodnommer 10111 bel, sê hulle ons val nie in hul gebied nie.

“Nou is ons letterlik verneder deur die polisie, maar nie een sê hy is jammer nie. Wat as dit wittes was wat valse verklarings teen swartes afgelê het? Ek vra die kaptein Gerber wat die operasie gelei het wat sy volgende aanslag teen ons is. Sy antwoord was: ‘Gee my jou selnommer dan laat weet ek jou.’ Sulke arrogansie!”

’n Polisiebeampte het hulle gister besoek en gesê die voorval sal ondersoek word, maar sy het nie baie vertroue daarin nie. “Die polisie beskerm die polisie en wie ondersoek die polisie? Ja, die polisie. Die publiek moet weet wat aangaan. Honderde mense word só geteister.”

Sers. Mmako Mophiring, woordvoerder van die polisie, het by navraag gesê hulle het ’n lasbrief gehad om op die plaas toe te slaan nadat hulle inligting oor beweerde wapens ontvang het. “Ons moet ons vergewis of dit waar is as ons inligting soos wapens of dwelms kry. Maar ons het niks op die plaas gekry nie.”

Op die Saaimans se klagte dat hulle weens vals inligting geteister word, het hy gesê die polisie sal moet vasstel waarom iemand “nie geloofwaardig is nie en hulle sal ondervra moet word”.

In dié stadium is daar egter nog nie sprake van klagtes teen die mense nie.

- Volksblad

Oorsprong:Volksblad
http://www.volksblad.com/Suid-Afrika/Nuus/Boeregesin-van-Bfn-meen-polisie-terroriseer-hulle-20100415

Eugene Terre'Blanche op plaas vermoor

Vermoor... Eugene Terre’Blanche in Desember verlede jaar by ’n saamtrek van die AWB in Ventersdorp. Foto: Rapport-argief

2010-04-03 23:24

Verslagspan

Die AWB-leier, mnr. Eugene Terre’Blanche (69), is gistermiddag vermoor in sy huis op sy plaas, Witrandjiesfontein, sowat 15 kilometer buite Ventersdorp in Noordwes.

“Ons het mnr. Terre’Blanche se lyk op sy bed gekry. Hy het veelvuldige beserings opgedoen – hy is erg vermink,” het kapt. Jaco Rautenbach, hoof van die speurtak op Ventersdorp, gisteraand uit die moordhuis aan Rapport gesê.

“Ons weet nie of hy aangeval is terwyl hy geslaap het nie. Ons het ’n kapmes op sy liggaam gekry.”

Rautenbach sê twee van Terre’Blanche se plaaswerkers is kort daarna op die plaas gearresteer. “’n Venster is gebreek en dit lyk of die aanvallers só toegang tot die huis verkry het.

“Dit wil voorkom of ’n twis oor geld aanleiding tot die aanval gegee het,” het Rautenbach gesê.

Terre’Blanche het die naweek alleen op die plaas deurgebring soos hy dikwels doen, het ’n vriendin van sy vrou, Martie, gisteraand uit die Terre’Blanche se huis in Ventersdorp aan Rapport gesê.

Sy was daar om mev. Terre’Blanche by te staan. “Hy het blykbaar lê en slaap toe hy met pangas doodgekap is.”

Die vrou, van ’n buurplaas, het aan Rapport gesê Martie Terre’Blanche is verslae. “Sy is ’n sterk vrou, maar sy is so wit soos ’n laken. Dit het nog nie by haar ingesink nie.

“Die dominee was hier en ek en ander gaan vanaand by haar slaap hier in die dorpshuis (langs die AWB-kantoor) in Ventersdorp.”

Volgens haar was Eugene se suster, Dora, en sy broer, Andries, gisteraand op die moordtoneel.

Hy is gistermiddag omstreeks 17:00 vermoor.

“Almal hier op die dorp is woedend en verslae.”

Volgens haar is vrese oor wraakaanvalle van enige aard egter ongegrond. “Die mense hier op Ventersdorp is nie rassiste nie. Ek is eerder bekommerd oor mense wat van elders af bel.”

Terre’Blanche is op 31 Januarie 1941 gebore. Tydens die laat sestigerjare het hy toenemend die liberale beleid van mnr. BJ Vorster, toe eerste minister van Suid-Afrika, beveg. Hy het in 1970 saam met ses ander die Afrikaner Weerstandbeweging gestig. Sy oratoriese vaardighede het hom die steun van groot getalle regsgesindes in die land besorg.

Terre’Blanche het die einde van apartheid as ’n oorgawe tot kommunisme beskou en het met ’n grootskaalse oorlog gedreig sou pres. FW de Klerk die mag aan mnr. Nelson Mandela en die ANC sou oorhandig.

Hy is op 17 June 1997 tot ses jaar gevonnis vir die aanranding op ’n petroljoggie en poging tot moord op ’n sekuriteitswag.

Hy was een van drie wit aangehoudenes in die Rooigrond-tronk naby Mafikeng, waar hy glo ’n wedergebore Christen geword het en na bewering baie van sy rassistiese sienings versag het. Terre’Blanche is op 11 Junie 2004 uit die tronk vrygelaat.

Terre’Blanche het in Februarie vanjaar nog die ANC-regering as ’n “teelkraal” beskryf wat “toelaat dat ons wit mense deur werklose skurke uitgemoor word”.

“Hulle steel nie meer van ons nie, maar hulle maak ons doelbewus dood om ons te demoraliseer,” het Terre’Blanche op ’n AWB-byeenkoms aan sowat 300 mense gesê.

Mev. Helen Zille, leier van die DA, het gisteraand die moord as ’n “absolute tradgedie” beskryf. “Geweld is geen oplossing vir ons land nie. Die tragiese is dat ekstremiste aan albei kante die klimaat geskep het. Dit kan net tot polarisasie lei, wat ons in 1994 vermy het. ”

Mnr. Dave Steward, woordvoerder van die FW de Klerk-stigting, het gesê: “Die realiteit is dat die klimaat in die land naby aan kookpunt is. Dit is moeilik om nie te sien dat sy moord nie verband hou met die ‘skiet die boer’-liedjie nie.

“Almal moet bedaar en die aard van die debat versag soos oudpres. FW de Klerk ’n paar weke gelede per brief aan pres. Jacob Zuma gesê het. Hy Zuma aangemoedig om as president gevoelens te kalmeer. Ongelukkig het dit nie gebeur nie.

“Wat nou gebeur het is baie gevaarlik. Mense is verskriklik opgesweep aan beide kante. Ongelukkig is dit die ANC wat die klimaat geskep het deur Malema se optrede goed te praat.”

Die vakbond Solidariteit se menseregte-inisiatief AfriForum het gesê die moord op Terre’Blanche is ’n wekroep tot al die mense van Suid-Afrika om tot besinning te kom en kennis te neem van die uiters gepolariseerde en gewelddadige omstandighede waarin die land hom tans bevind.

“Alle gemeenskappe moet hulle weerhou van onverskillige uitsprake en van die romantisering van geweld,” het mnr. Willie Spies, AfriForum-woordvoerder, gesê.

Oorsprong:Rapport
http://www.rapport.co.za/Content/Suid-Afrika/Nuus/2315/a9059a4ba151499ab966092e9c2902e7/03-04-2010-11-24/Eugene_TerreBlanche_op_plaas_vermoor

Eugene Terre'Blanche op sy plaas vermoor

2010-04-03 22:48

Amy Johnson

Kaapstad - Die AWB-leier Eugene Terre'Blanche is Saterdag op sy plaas in Ventersdorp deur plaaswerkers vermoor, het sy dogter Bea Terre'Blanche aan Nuus24 bevestig.

Terre'Blanche is op Maandag 31 Januarie 1944 in Ventersdorp in die Noordwes gebore. Hy het op 7 Julie 1973 met slegs ses geesgenote die AWB gestig.

Terre'Blanche is net na 18:00 in sy slaap met pangas op sy plaas aangeval. Niks is gesteel nie.

Me. Terre'Blanche het gesê hulle het die tyding by familievriende gekry en dat dit 'n groot skok vir die familie was.

"My pa het soms alleen op die plaas gaan slaap om na die diere te kyk. Dit was vir ons 'n geweldige skok om te hoor hy is dood."

Me. Terre'Blanche woon in die dorp.

Sy het gesê die familie vermoed twee of meer mense het haar pa vermoor.

"Die polisie het twee mense in hegtenis geneem, maar dit is al inligting wat ons in dié stadium het."

Sy het gesê begrafnisreëlings is nog nie getref nie, maar sal Sondag bespreek word.

– Nuus24

Oorsprong:Nuus24
http://www.nuus24.com/Content/Suid-Afrika/Nuus/1479/a1b656025be8446db493e8e625b88d97/03-04-2010-10-48/Eugene_TerreBlanche_op_sy_plaas_vermoor

Reg geskied na gru-moord

Written by Lowvelder Editor

Tuesday, 03 November 2009

NELSPRUIT - ‘n Plaaswerker wat gereeld in ’n tenger bejaarde vrou se tuin gewerk het, is die week in die Noord Gautengse Hooggeregshof skuldig bevind aan die sinnelose moord op haar.

Jabulanie Leyne (27) van Curlews is effektief 25 jaar tronk toe gestuur nadat hy ‘n tuisgemaakte mes gebruik het om
me. Sannie Viljoen (87) se keel af te sny. Hy het haar ook ses keer gesteek voordat hy met R300 en ‘n paar juwele gevlug het. Die voorval het op 27 Julie 2007 plaasgevind.

Viljoen het alleen in ‘n huis ongeveer 30 meter van haar dogter, me. Annatjie Liebenberg, se huis op dieselfde plaas in Curlews gewoon. Liebenberg het die oggend na die voorval gaan ondersoek instel omdat haar ma nie haar vensters en deur oopgemaak het soos sy gewoond was nie. Haar ma het in ‘n plas bloed in die kombuis gelê. Leyne het een van die huis se vensters gebreek om toegang te verkry. Die gesin het 17 jaar op die plaas gewoon. Met streng veiligheidsmaatreëls in plek was daar geen kriminele aktiwiteite tot en met die aanval nie.

Volgens kapt. Erhard Ströh van Witrivier Polisiestasie het hulle ‘n maand na die voorval vir Leyne gearresteer nadat sy vingerafdrukke op die toneel gevind is. Hulle het van haar besittings in sy besit gekry en DNS-toetse het hom ook met die misdaadtoneel verbind. Leyne het op die plaas gewoon en vir haar skoonseun op die plaas gewerk.

Leyne het skuldig gepleit op ‘n klag van moord, asook huisbraak met die opset om gewapende roof te pleeg.

Hy is tot 20 jaar tronkstraf gevonnis vir die moorde en 12 jaar vir huisbraak. Regter Halima Saldulker het gelas dat sewe jaar van die huisbraak-vonnis samelopend met die moordvonnis uitgedien moet word. Sy het sterk uitgevaar teen Leyne se dade en dit as ‘n sinnelose moord op ‘n ou vrou wat geen weerstand kon bied nie, beskryf.

Kommentaar

25 Jaar? (Juanique Liebenberg) 25 jaar sal nie my ouma terug bring nie! 25 jaar sal nie die pyn en verlange ooit kan wegvat nie. Ek kan nie help om te wonder of reg en geregtigheid werklik geskied het nie. Ek troos my daaraan dat hy eendag aan my God en Hemelse vader moet antwoord vir sy dade en ek glo daar sal werklike geregtigheid geskied. Die wraak kom my nie toe nie, ek sal vertroosting soek by God.

Oorsprong:Die Laevelder
http://www.lowvelder.co.za/index.php?option=com_content&view=article&id=715:reg-geskied-na-gru-moord&catid=34:news&Itemid=75

Bejaarde vrou op pad kerk toe gekaap

2009-11-23 02:58

WESSELSBRON. – ’n Bejaarde vrou van ’n plaas buite die dorp is gisteroggend op pad kerk toe gekaap.

Mev. Ina Fourie sê haar ma, mev. Rina Wessels (78), was van die plaas af op pad kerk toe. “Skaars ’n kilometer van die plaas moes sy in die pad stilhou, want daar was groot sementbakstene in die pad gepak. ’n Man het langs haar motor verskyn en haar beveel om oor te skuif na die passasiersitplek.”

Sy sê haar ma se voet het aan die stuurwiel vasgehaak en sy het baie seergekry. Die man het vir Wessels gevra waarheen sy op pad is en hy het aangebied om haar kerk toe te vat. Hy het egter van plan verander.

Die man het begin ry, maar is nie ’n goeie bestuurder nie. “ ’n Ent verder het my ma voorgestel dat sy bestuur, omdat hy nie kan bestuur nie. Hulle het stilgehou, maar toe sleep hy my ma uit haar motor.”

Hy het haar na ’n sloot langs die pad gesleep waar hy haar met toue vasgebind het.

Hy is toe met haar motor en handsak weg.

Fourie sê haar ma kon daarin slaag om haarself los te kry en het begin aanstap dorp toe. ’n Motorfietsryer het by haar gestop en hulp aangebied.

Hy het Fourie gebel.

“Dit is ’n baie traumatiese ervaring vir my ma. Haar bors is baie seer want die man het met sy knie op haar bors gedruk toe hy haar met die toue vasgebind het.

“Sy het oral blou kolle. Hy het ook die hele tyd gedreig om haar dood te maak.”

Wessels sterk by Fourie aan. Sy bly in haar eie huis saam met haar seun op ’n plaas.

- Volksblad

Oorsprong:Volksblad
http://www.volksblad.com/Content/Suid-Afrika/Nuus/2114/047d3129a50f4e3d865757d7575f3410/23-11-2009-02-58/Bejaarde_vrou_op_pad_kerk_toe_gekaap

Egpaar op plaas aangeval: 2 dalk verbind met huisbrake

2009-11-04 00:20

Marietie Louw-Carstens

Die twee mans wat ’n boer van Limpopo glo verlede Sondag met knopkieries geslaan het kan dalk met drie huisbrake verbind word.

Supt. Ronel Otto, provinsiale polisiewoordvoerder, het gesê die polisie ondersoek die twee mans se beweerde verbintenis met ander huisbrake. Die 23-jarige man en sy 29-jarige makker is albei van die Blouberg-gebied in Limpopo.

Hulle is in hegtenis geneem ná die aanval op mnr. Izak Janse van Vuuren (59) van die plaas Clamwilliam in die Swartwater-gebied.

Otto het gesê die twee mans sal vandag in die landdroshof in Mokopane (Potgietersrus) op aanklagte van poging tot moord verskyn.

Mnr. Janse van Vuuren het gister uit sy bed in die Steve Biko-hospitaal in Pretoria gesê “dit gaan goed”.

Hy het eergister ’n operasie aan sy neus ondergaan nadat dit tydens die aanval tot op die been oopgekloof is. Hy is bly die polisie het die twee mans in hegtenis geneem.

Janse van Vuuren en sy vrou, Mariaan (56), is Sondagoggend oorval toe hulle van die kerk teruggekom het op die plaas.

Mnr. Janse van Vuuren is verskeie kere met knopkieries en ’n hamer oor die kop en in die gesig geslaan. Sy aanvallers het hom daarna agter op sy bakkie onder ’n seil laat lê.

Mev. Janse van Vuuren is voor in die bakkie geboender voordat die booswigte teen ’n hoë spoed in die rigting van die plaas gery het. Hulle het beheer oor die voertuig verloor en teen ’n wildheining tot stilstand gekom.

Die twee mans het daarna weggehardloop.

Boere in die gebied het ’n private helikopter en twee vastevlerkvliegtuie ingespan om die polisie te help soek na die twee vermeende aanvallers. Die een is sowat ’n uur ná die aanval in hegtenis geneem. Sy makker is later dieselfde aand vasgetrek. Die aanval op die egpaar is die derde aanval in minder as twee weke in die Waterberg-streek.

- Beeld

Oorsprong:Beeld
http://www.beeld.com/Content/Suid-Afrika/Nuus/1928/dd94a2c42dbc4ae6ad402516890d7f5c/04-11-2009-12-20/Egpaar_op_plaas_aangeval_2_dalk_verbind_met_huisbrake

Landbou in Noordwes kap LUR oor sy uitlatings

2009-10-01 00:38

Nicolize van der Walt

Klerksdorp. – Die georganiseerde landbou het hulle skerp teen die optrede vandeesweek van mnr. Howard Yawa, LUR vir openbare veiligheid in Noordwes, uitgespreek nadat ’n boer van Lichtenburg glo ’n betreder op sy plaas gewond het.

Agri Noordwes en TLU SA het hul misnoeë met Yawa se optrede in verklarings uitgespreek.

Yawa het mnr. Oupa Mokgalagadi, die vermeende slagoffer, in die hospitaal besoek en hom verseker “die regstelsel sal optree teen trigger-happy boere wat ongewapende landsburgers om watter rede ook al skiet”. Yawa het ook gewaarsku “dis nie die wilde Weste dié nie”.

Mnr. Jan Wessel van der Berg (49) van die plaas Mooimeisiesfontein naby Rooigrond in die Lichtenburg-distrik het vroeër vandeesweek in die hof verskyn op aanklag van poging tot moord. Hy is op borgtog van R6 000 vrygelaat.

Mnr. Andries Beyers, president van Agri Noordwes, het gesê: “Verpolitisering en wanvoorstelling van die jongste voorval op ’n plaas by Rooigrond waarin ’n misdadiger op heterdaad betrap is waar hy omheiningsmateriaal steel en toe regmatig gewond is nadat hy die plaaseienaar aangeval het, is egter tekenend van opportunistiese politici en vakbonde. se misbruik en uitbuiting van sulke voorvalle. Dit is kommerwekkend dat die rassekaart voortdurend gespeel word.

“Byna elke keer dat ’n voorval op ’n plaas afspeel, ongeag die feitelike omstandighede, word die misdadige oortreders as die onskuldige slagoffers en die plaaseienaar as die rassistiese aggressor uitgebeeld.”

Volgens Agri Noordwes is plaasaanvalle en rooftogte gewelddadig en wreed en die aanvallers het dikwels vuurwapens en gebruik dit.

“Om onder hierdie omstandighede van ‘trigger-happy’ boere en die ‘Wild West’ te praat is onvanpas en ’n openbaring van die LUR se wanopvatting van die heersende veiligheidstoestande op plase.”

Mnr. Boeta du Toit, uitvoerende bestuurder van Agri Noordwes, het wel in die verklaring Yawa se pogings om met die boeregemeenskap in gesprek te tree, verwelkom.

TLU SA het egter laat blyk hulle besin ernstig oor die sinvolheid van ’n gesprek oor misdaad met Yawa.

“Dit is moeilik om sinvol met iemand te praat wat al besluit het plaasboere het ’n Wilde Weste-benadering deur links en regs op plaaswerkers te skiet. Die LUR se uitlatings was verregaande, want die polisie-ondersoek is nog nie eens afgehandel nie,’’ het mnr. Wilhelm Rochér, voorsitter van TLU SA se Wes-streek, gesê.

Yawa het teen druktyd nie op Beeld se navrae om kommentaar gereageer nie.

- Beeld

Oorsprong:Beeld
http://www.beeld.com/Content/Suid-Afrika/Nuus/1928/a998e250e6fe46388b2a5f3fb9861fca/01-10-2009-12-38/Landbou_in_Noordwes_kap_LUR_oor_sy_uitlatings

Rowers sny skaapboer se keel af

Apr 29 2009 08:31:49:803PM - (SA)

Jana Engelbrecht

Sutherland. – ’n 71-jarige merino-boer se keel is eergisteraand in sy huis op die plaas Keerom afgesny.

Vier verdagtes is gister op die dorp aangekeer.

Mnr. Klaas van Wyk se buurvrou, me. Elsa van der Merwe, het gisteroggend vroeg op sy omgeslane bakkie op die grondpad tussen die dorp en die plaas afgekom. Sy het haar man, Witjan, gebel en hy is na die plaashuis.

“Die deure was oop,” het hy gesê. “Die ligte het gebrand. Die kluis is uit die muur geruk. Die hele huis was deurmekaar. Daar was bloed oral.”

Van der Merwe het na die kombuis gegaan en na Van Wyk geroep. “Daar was geen antwoord nie. Ek het hom toe in sy kamer op die bed gekry.”

Van Wyk is vermoedelik in die voorportaal vermoor en na sy slaapkamer gesleep.

“Dit lyk of daar ’n klomp steke in sy bolyf is. Bo sy heup was ook ’n steekplek wat hy moontlik met ’n plastieksakkie probeer toedruk het.”

Dit was die wreedste toneel wat hy in sy lewe aanskou het, het Van der Merwe gesê.

“Van Wyk was ’n vredeliewende mens. Hy het niemand aanstoot gegee nie. Hy was ’n oujongkêrel. Ek meen hy was ’n sagte teiken.”

Van der Merwe het gesê hy “wil nie eens weet” wat die moord op ’n onskuldige man aan toerisme op die dorp gaan doen nie.

Supt. Hendrik Swart, polisiewoordvoerder, het gesê vier mans is Woensdag in verband met die moord in hegtenis geneem.

Plaaswerkers wat op Van Wyk se plaas bly, het Dinsdag omstreeks 21:00 ’n gelag van die plaashuis gehoor.

“Dit was vermoedelik die tyd toe die verdagtes die plaashuis besoek en die misdaad gepleeg het.”

Die moordenaars het glo werkers op ’n ander plaas besoek. Hulle was na bewering besope.

Mnr. Wessel van der Merwe, voorsitter van Agri Noord-Kaap en Witjan se broer, het versoek dat die verdagtes geen borgtog kry nie.

“Ons sal ’n versoekskrif aan die polisie hier oorhandig wat op die maksimum straf vir die misdaad aandring. Sulke gevalle knou die landbou in die Noord-Kaap.

“Ons as landbougemeenskap is uiters kwesbaar gelaat met die groot vakuum wat heers nadat die kommandostelsel uitgefaseer en ’n ondoeltreffende polisiereservistestelsel ingestel is.”

Oorsprong:Beeld
http://jv.news24.com/Beeld/Suid-Afrika/0,,3-975_2508943,00.html

Geskiet terwyl hy vleis braai

Mar 09 2009 08:48:20:097PM - (SA)

Marietie Louw-Carstens

Polokwane (Pietersburg). – ’n Man van dié stad is die naweek koelbloedig doodgeskiet terwyl hy op ’n plaas naby Modimolle (Nylstroom) in Limpopo tydens sy vrou se verjaardagviering vleis gebraai het.

Mnr. Hendrik Petrus Riaan van der Walt (44) is op slag dood waar hy langs die braaivleisvuur gestaan het.

Kapt. Malesela Mogale, die ondersoekbeampte, het gistermiddag gesê Van der Walt is met ’n .308-jaggeweer geskiet.

Die geweer is sowat drie weke gelede tydens ’n huisrooftog in Modimolle gesteel. Die polisie het die geweer ná die moord op die plaas gekry.

’n Onbekende aantal gewapende aanvallers het Vrydagaand uit die bosse op dié plaas op Van der Walt losgebrand en nog mense wat die geselligheid van sy vrou, Wilma, bygewoon het.

Die rede vir die aanval is onbekend, het supt. Malesela Ledwaba, polisiewoordvoerder in Modimolle, gesê.

Ledwaba het gesê Van der Walt is op ’n kort afstand geskiet.

Volgens Mogale is Van der Walt in die linkerarm getref en is die koeël by sy bors uit.

“Sy linkerarm was in die lug. Van die ooggetuies sê hy het iets vasgehou wat hy gedrink het, maar ander sê sy hand was in die lug soos hy iets beduie het,” het Mogale gesê.

Beeld verneem die polisie het die spore van die aanvallers tot by die Phagameng-woongebied, buite Modimolle, gevolg.

Die spoor het hier doodgeloop en niemand is nog vasgetrek nie.

Die geselligheid was op ’n plaas in die Suikerfontein-gebied.

Dit is loopafstand van die Engen-motorhawe op die N1-hoofweg naby Kranskop. Die skietery was omstreeks 21:30.

Ledwaba het gesê die polisie ondersoek nog of die plaasbestuurder op die aanvallers teruggeskiet het.

Niemand anders is beseer nie.

’n Verslae mev. Marie van der Walt van Mokopane (Potgietersrus) het gesê dit lyk of haar seun op die verkeerde tyd op die verkeerde plek was.

Sy het gesê haar skoondogter is uiters geskok.

Van der Walt se vrou was nie gister vir kommentaar beskikbaar nie. Hul huis in Suidstraat in dié stad was gister verlate. Sy vrou was by familie.

Me. Yolandé van der Walt, sy eksvrou, het gistermiddag gesê Van der Walt was ’n goeie man. “Hy was altyd daar vir sy medemens en het omgegee vir mense. Hy het dít nie verdien nie . . . ”

Hulle is in 2006 ná ’n huwelik van 20 jaar geskei. Hul dogter, Mari-Anka (19), is baie geskok oor haar pa se dood. “Sy het flou geword toe ek haar van sy dood gesê het,” het haar ma gesê.

’n Lykskouing word moontlik vandag gehou.

Hy het by Polokwane Smelters buite dié stad gewerk. Hy is in Oktober 2006 met sy tweede vrou, Wilma, getroud en hulle het nie saam kinders nie.

Nog geen begrafnisreëlings is getref nie.

Enigiemand met inligting kan Mogale by 082 565 8606 bel.

Oorsprong:Beeld
http://jv.news24.com/Beeld/Suid-Afrika/Home/0,,3-975_moreStories,00.html